– يمپورتقا تاۋەلدى ازىق-تۇلىكتىڭ كوبىنىڭ، مىسالى، قانتتىڭ باعاسى، قالاساق تا، قالاماساق تا وسە بەرەدى. ويتكەنى بۇكىل الەمدە بيرجادا باعا ءوسىپ بارادى، نەگىزگى ءونىم وندىرەتىن ەلدەردىڭ قورىنداعى قانت تا قىمباتتاپ جاتىر. ءبىز قانت الاتىن ەلدەردىڭ ءبىرى رەسەي ءونىم جىبەرۋدى شەكتەگەندىكتەن، ارينە، ول دا اسەر ەتەدى. بۇكىل الەم بويىنشا لوگيستيكا شىعىنى ءوسىپ جاتىر، دوللار، ەۋرو دا كوتەرىلىپ بارادى، – دەدى مينيستر سۇلتانوۆ.
قازاقستان ساۋدا مينيسترلىگىنىڭ دەرەگىنشە، مەملەكەت وزگە ەلدەردەن 100 مىڭ توننا قانت سۇراعان. مينيستر ءقازىر ەلدە 350 توننا قانت بارىن ايتتى.
– ءبىز وزگە ەلدەردەن قانت سۇرادىق. الەمدە ءىرى كولەمدە قانت ساتاتىندار قاتارىندا برازيليا، ءۇندىستان مەن ۆەتنام بار. ءبىراق ءۇندىستان دا شەكتەدى، سوندىقتان ءقازىر كەلىسسوز جۇرگىزىپ جاتىرمىز، – دەدى سۇلتانوۆ.
بۇعان قوسا مينيستر ءقازىر قازاقستان اۋىلشارۋاشىلىعى مينيسترلىگى كەلىسسوز جۇرگىزىپ، ەسەپ-قيساپ جاساپ جاتقانىن دا ايتتى.
ونىڭ سوزىنشە، ۋكراينادا سوعىس باستالعانعا دەيىن قازاقستان سىرتتان كەلەتىن قانتتىڭ 70 پايىزىن رەسەيدەن الىپ كەلگەن. ويتكەنى لوگيستيكا جاعىنان بۇل بىزگە ءتيىمدى بولدى دەيدى مينيستر.
– نارىق كونيۋنكتۋراسى سونداي بولدى، ياعني بىزگە شەتتەن كەلەتىن قانتتىڭ 70 پايىزىن برازيليادان تاسىعاننان گورى رەسەيدەن ساتىپ الۋ ارزانعا ءتۇستى. ءقازىر ءبىز شەكتەۋگە تاپ بولعاندىقتان، لوگيستيكانى وزگەرتۋگە تۋرا كەلەدى، – دەيدى باقىت سۇلتانوۆ.
ۋكرايناعا باسىپ كىرگەن رەسەيگە باتىس ەلدەرى سانكسيا سالعاننان كەيىن ماسكەۋ ازىق-تۇلىكتىڭ كەيبىر ءتۇرىن، سونىڭ ىشىندە قانتتى ەكسپورتقا شىعارۋدى شەكتەگەن. قازاقستاننىڭ ءبىرقاتار ايماعىندا قانت باعاسى كۇرت ءوسىپ، ساۋدا ورىندارى تۇتىنۋشىعا قانتتى شەكتەپ ساتا باستاعان. قازاقستان كونديتەرلەرى شيكىزات باعاسى ءوسىپ كەتكەندىكتەن تىعىرىققا تىرەلگەنىن ايتىپ شاعىنعان.
ەلدە قانت تاپشىلىعى سەزىلە باستاعاننان كەيىن ۇكىمەت 23 مامىردان باستاپ قازاقستاننان سىرتقا اق قانت پەن قانت شيكىزاتىن شىعارۋعا جارتى جىلعا شەكتەۋ ەنگىزگەن.
مامىردىڭ اياعىندا باسپا ءسوز قۇرالدارى قازاقستاننىڭ وسى كەزگە دەيىن ءونىمدى رەسەيدەن الىپ كەلگەن ايماقتارىندا قانت تاپشى ەكەنىن حابارلاعان. وسى اپتادا ەلدىڭ ءبىرقاتار وڭىرىندە الەۋمەتتىك دۇكەندەر ءبىر ادامعا ءبىر-اق كەلى قانت ساتۋعا كوشكەن. ءتىپتى بازارلاردىڭ وزىندە وسىنداي شەكتەۋ ەنگىزىلگەنى بايقالعان.
