ەسكە سالا كەتەيىك، 37 جاستاعى ەرمەك ابدىرەشوۆ قاڭتار وقيعاسىنان كەيىن سوقىر بوپ قالعان بولاتىن. ءبىر كوزى ميتينگتىڭ قىزىپ تۇرعان شاعىندا بەتىنە رەزەڭكە وق ءتيىپ، كوزىن زاقىمداعان. ەكىنشى كوزى تەرگەۋ يزولياتورىنداعى ازاپتاۋدان كەيىن كورمەي قالعان.
5 قاڭتار كۇنى ەرمەك الماتى قالاسىنداعى رەسپۋبليكا الاڭىندا وتكەن بەيبىت ميتينگكە شىققان بولاتىن. سول كەزدە قۇقىق قورعاۋشىلار دەمونسترانتتارعا قارسى جارىق شۋىلى بار گراناتالار جارىپ، تراۆماتيكالىق تاپانشالارمەن وق جاۋدىرعان-دى. سول كەزدە ەرمەك جارالانىپ، جانساقتاۋ بولىمىنە تۇسەدى.
ارادا ءتورت كۇن وتكەننەن كەيىن ونى فورما كيگەن ادامدار كەلىپ، اۋرۋحانادان الىپ كەتەدى. ولار ونى تەرگەۋ يزولياتورىنا اپارىپ، تارتىپسىزدىكتەرگە قاتىسقانى ءۇشىن ايىپتاعان.
قوردىڭ حابارلاۋىنشا، جىگىتتىڭ وتباسى ونىڭ تەرگەۋ يزولياتورىندا وتىرعانىن تەك 19 قاڭتاردا عانا بىلگەن. تۋىستارى شۋ كوتەرىپ، ەرمەكتى تەرگەۋ يزولياتورىنان الىپ شىعادى. كەيىن الماتى تۇرعىنى ءىس بويىنشا جابىرلەنۋشى بولىپ تانىلدى.
ەرمەك ابدىرەشوۆكە قاتىستى QANTAR قورىنىڭ ادۆوكاتتارى كوپتەگەن زاڭ بۇزۋشىلىقتى انىقتاعان. مىسالى، سوقىر ادامنان زاڭدى وكىلسىز جاۋاپ الىنعان. سونداي-اق، وقي المايتىن بىلە تۇرا، جاۋاپ الۋ حاتتاماسىنا قول قويۋعا ماجبۇرلەگەن.
ايىپتاۋدى الىپ تاستاۋ – ءالى كۇرەستىڭ باسى عانا. الدا ءالى جۇمىس كوپ. ەرمەكتى ازاپتاعان پوليسەي ءالى كۇنگە بوستاندىقتا. ول ءىس بويىنشا كۋاگەر رەتىندە وتەدى. قۇقىق قورعاۋشىلار ونىڭ قاتىسۋىمەن ازاپتاۋدىڭ 13 ەپيزودىن انىقتادى. پوليسەيدى زارداپ شەككەندەر مەن كۋاگەرلەر تانىدى، –دەلىنگەن QANTAR قورى تاراتقان مالىمەتتە.
