پودپولكوۆنيك عالىمجان ءسادۋاقاسوۆ قارالى قاڭتار كەزىندە كوكتوبەدە شەكاراشىلار مەن ىشكى ىستەر مينيسترلىگى بولىمشەلەرى اراسىندا اتىس بولعانىن ايتقان ەدى. ىشكى ىستەر ءمينيسترى ەرجان سادەنوۆ وسى مالىمدەمەگە قاتىستى پىكىر ءبىلدىردى، - دەپ حابارلايدى Dalanews.kz.
"قاڭتار وقيعاسى بويىنشا ءىستى ارنايى پروكۋرورلار قاراپ جاتىر، سوندىقتان وعان قاتىستى پىكىر ءبىلدىرۋىم دۇرىس ەمەس بولار. پوليسيا دا ۇرلىق سەكىلدى بەلگىلى ءبىر ىستەردى تەرگەۋمەن اينالىستى. سوندىقتان بۇل جەردە كەز كەلگەن مالىمدەمە تەكسەرىلىپ، ءتيىس باعاسىن الادى"، - دەيدى سادەنوۆ ءماجىلىس كۋلۋارىندا.
ايتا كەتەيىك، بۇعان دەيىن پودپولكوۆنيك عالىمجان ءسادۋاقاسوۆ "ازاتتىق" راديوسىنا بەرگەن سۇحباتىندا 2022 جىلى قاڭتار وقيعاسى كەزىندە كوكتوبەدە شەكاراشىلار مەن ىشكى ىستەر مينيسترلىگى بولىمشەلەرى اراسىندا اتىس بولعانىن ايتقان بولاتىن.
ءسادۋاقاسوۆتىڭ سوزىنشە، 6 قاڭتاردا اكادەمياعا وفيسەرلەر مەن كۋرسانتتاردى تەلەمۇنارا ورنالاسقان قالانىڭ وڭتۇستىك-شىعىس بولىگىندەگى كوكتوبە تاۋىنا جىبەرۋ تۋرالى بۇيرىق تۇسكەن. كۋرسانتتارمەن بىرگە پودپولكوۆنيك تە سول جەرگە بارعان.
شەكاراشىلار كوكتوبەگە لاڭكەستەر ەمەس، پوليسيانىڭ ارنايى جاساعى كەلگەنىن بىلمەگەن. ولارعا ەشكىم ەسكەرتپەگەن. شەكاراشىلاردىڭ اسكەري كولىگىنىڭ بىت-شىتى شىققان.
توپتا ودان بولەك تاعى 13 ادام بولعان.
"ازاتتىق راديوسى" مالىمەتىنشە، ۇلتتىق قاۋىپسىزدىك كوميتەتى قاندى وقيعالاردان كەيىن "2022 جىلى قاڭتاردىڭ العاشى كۇندەرى "قىلمىسكەرلەر تەلەراديوحابار تاراتاتىن كوكتوبە مۇناراسىن باسىپ الىپ، سول جەردەن حابار تاراتىپ، تالاپتارىن ايتپاق بولدى، ءبىراق شەكاراشىلار شابۋىلدى تويتاردى" دەپ مالىمدەدى.
الايدا عالىمجان ءسادۋاقاسوۆتىڭ بەرگەن ايعاعى كۇش قۇرىلىمدارى مۇلدە جۇمىلا ارەكەت ەتپەگەنىن كورسەتەدى.
بەلگىلى بولعانداي، ءسادۋاقاسوۆ بۇل سۇحباتتا قاڭتارعا قاتىستى جاڭا دەرەكتەردىڭ بەتىن اشقان.
شەكاراشىلار مەن پوليسيا قىزمەتكەرلەرى اراسىنداعى اتىس تۋرالى ايتىلعان سۇحبات كوپتى ەلەڭ ەتكىزگەن ەدى. سەبەبى، قارالىم ەكى اپتانىڭ توڭىرەگىندە 1 ملن-دى ماڭايلادى.
«نارازىلىقتىڭ العاشقى كۇندەرىندە باسشىلىقتىڭ، دالىرەك ايتقاندا گەنەرال-مايور سەرىك ءجازيننىڭ بۇيرىعىمەن كوكتوبە تەلەمۇناراسىن قورعاۋعا ارىپتەستەرمەن بىرگە اتسالىستىق. ستراتەگيالىق نىساندى قورعاۋ بارىسىندا قاقتىعىس ورىن الىپ، ارتى اتىسقا ۇلاستى. كەيىن قارسىلاستاردىڭ لاڭكەس ەمەس، پوليسيانىڭ ارنايى جاساعى ەكەنىن بىلدىك...»، - دەگەن ەدى ءسادۋاقاسوۆ سۇحباتتا.
مۇندا تاعى ءبىر ماڭىزدى اقپاراتتىڭ شەتى شىعادى.
47 جاستاعى پودپولكوۆنيك قاڭتاردا شەكارا قىزمەتى اكادەمياسىنا شابۋىل سىرتتان جاسالماعانىنا سەنىمدى.
ول بۇل ۇرىس كوكتوبە تەلەمۇناراسىنداعى قاقتىعىسپەن قاتار وربىگەنىن ايتادى.
«قيان-كەسكى اتىستا ادام شىعىنى ورىن الدى. ءبىراق، سوڭىندا كۋرسانتتار مەن اكادەميا قىزمەتكەرلەرى دۇربەلەڭدە بىر-بىرىنە وق جاۋدىرعان بولىپ شىقتى. ءبىز تەلەمۇناراعا كۇندىز شىقتىق. حالىقتىڭ ءبىرازى ءبىزدىڭ بارا جاتقانىمىزدى كوردى. تەلەورتالىق ديرەكتورى دا قورعاۋعا كەلگەنىمىزدى بىلەتىن. ءبىزدىڭ سوندا ەكەنىمىزدەن ءبارى حاباردار ەدى. سوندا ءىىم قىزمەتكەرلەرىنە شابۋىل جاسا دەپ بۇيرىق بەرگەن كىم؟ بۇل الدە ارانداتۋشىلىق پا؟ نە ەكەنىن تۇسىنسەم بۇيىرماسىن؟»، - دەگەن ەدى ءسادۋاقاسوۆ.
