Podpolkovnik Ǵalymjan Sádýaqasov qaraly Qańtar kezinde Kóktóbede shekarashylar men Ishki ister ministrligi bólimsheleri arasynda atys bolǵanyn aitqan edi. Ishki ister ministri Erjan Sádenov osy málimdemege qatysty pikir bildirdi, - dep habarlaidy Dalanews.kz.
"Qańtar oqiǵasy boiynsha isti arnaiy prokýrorlar qarap jatyr, sondyqtan oǵan qatysty pikir bildirýim durys emes bolar. Politsiia da urlyq sekildi belgili bir isterdi tergeýmen ainalysty. Sondyqtan bul jerde kez kelgen málimdeme tekserilip, tiis baǵasyn alady", - deidi Sádenov Májilis kýlýarynda.
Aita keteiik, buǵan deiin podpolkovnik Ǵalymjan Sádýaqasov "Azattyq" radiosyna bergen suhbatynda 2022 jyly Qańtar oqiǵasy kezinde Kóktóbede shekarashylar men ishki ister ministrligi bólimsheleri arasynda atys bolǵanyn aitqan bolatyn.
Sádýaqasovtyń sózinshe, 6 qańtarda akademiiaǵa ofitserler men kýrsanttardy telemunara ornalasqan qalanyń ońtústik-shyǵys bóligindegi Kóktóbe taýyna jiberý týraly buiryq túsken. Kýrsanttarmen birge podpolkovnik te sol jerge barǵan.
Shekarashylar Kóktóbege lańkester emes, politsiianyń arnaiy jasaǵy kelgenin bilmegen. Olarǵa eshkim eskertpegen. Shekarashylardyń áskeri kóliginiń byt-shyty shyqqan.
Topta odan bólek taǵy 13 adam bolǵan.
"Azattyq radiosy" málimetinshe, Ulttyq qaýipsizdik komiteti qandy oqiǵalardan keiin "2022 jyly qańtardyń alǵashy kúnderi "qylmyskerler teleradiohabar taratatyn Kóktóbe munarasyn basyp alyp, sol jerden habar taratyp, talaptaryn aitpaq boldy, biraq shekarashylar shabýyldy toitardy" dep málimdedi.
Alaida Ǵalymjan Sádýaqasovtyń bergen aiǵaǵy kúsh qurylymdary múlde jumyla áreket etpegenin kórsetedi.
Belgili bolǵandai, Sádýaqasov bul suhbatta qańtarǵa qatysty jańa derekterdiń betin ashqan.
Shekarashylar men politsiia qyzmetkerleri arasyndaǵy atys týraly aitylǵan suhbat kópti eleń etkizgen edi. Sebebi, qaralym eki aptanyń tóńireginde 1 mln-dy mańailady.
«Narazylyqtyń alǵashqy kúnderinde basshylyqtyń, dálirek aitqanda general-maior Serik Jazinniń buiryǵymen Kóktóbe telemunarasyn qorǵaýǵa áriptestermen birge atsalystyq. Strategiialyq nysandy qorǵaý barysynda qaqtyǵys oryn alyp, arty atysqa ulasty. Keiin qarsylastardyń lańkes emes, politsiianyń arnaiy jasaǵy ekenin bildik...», - degen edi Sádýaqasov suhbatta.
Munda taǵy bir mańyzdy aqparattyń sheti shyǵady.
47 jastaǵy podpolkovnik Qańtarda shekara qyzmeti akademiiasyna shabýyl syrttan jasalmaǵanyna senimdi.
Ol bul urys Kóktóbe telemunarasyndaǵy qaqtyǵyspen qatar órbigenin aitady.
«Qiian-keski atysta adam shyǵyny oryn aldy. Biraq, sońynda kýrsanttar men akademiia qyzmetkerleri dúrbeleńde bir-birine oq jaýdyrǵan bolyp shyqty. Biz telemunaraǵa kúndiz shyqtyq. Halyqtyń birazy bizdiń bara jatqanymyzdy kórdi. Teleortalyq direktory da qorǵaýǵa kelgenimizdi biletin. Bizdiń sonda ekenimizden bári habardar edi. Sonda IIM qyzmetkerlerine shabýyl jasa dep buiryq bergen kim? Bul álde arandatýshylyq pa? Ne ekenin túsinsem buiyrmasyn?», - degen edi Sádýaqasov.
