ەڭ الدىمەن قۇتتىقتاۋ سوزگە شىققان اۋدان اكىمى باقىت اسانوۆ جاڭادان قۇرىلعان اۋدانعا تانىمال بوكسشىنىڭ كەلۋى ۇلكەن قۋانىش ەكەنىن اتاپ ءوتىپ، ىزگى تىلەگىن ارنادى.
– بۇگىن اۋدانىمىزعا بۇكىل الەمگە تانىمال كاسىپقوي بوكسشى قانات يسلام قوناققا كەلدى. بۇل جاڭادان قۇرىلعان اۋدانىمىز ءۇشىن، ماقتاارالدىقتار ءۇشىن زور قۋانىش! قاناتتىڭ ءاربىر جەكپە-جەگىن ماقتاارالدىقتار جان كۇيدىرە وتىرىپ تاماشالايدى. ونىڭ رينگتەگى ءاربىر سوققىسى ەلىمىزدىڭ نامىسىن، ابىرويىن كوتەرۋگە باعىتتالعان. ول – رۋحى بيىك، ءور مىنەزدى، ەلىمىزدىڭ ناعىز ۇلتجاندى ازاماتى. ماقتاارال اۋدانىنىڭ اكىمدىگى جەرگىلىكتى جەردەن مىقتى سپورتشىلاردى، كاسىپقوي بوكسشىلاردى دايىنداپ شىعارۋ ءۇشىن قانات يسلام سياقتى تۇلعالاردى ناسيحاتتاۋدى توقتاتپايدى. سوندىقتان، كيەلى ماقتاارال اۋدانىنا كەلگەنىڭىز ءۇشىن سىزگە العىسىمدى بىلدىرە وتىرىپ دەنىڭىزگە ساۋلىق تىلەيمىن. ەلىمىزدىڭ كوك تۋىن جەلبىرەتۋدەن شارشاماڭىز! – دەدى باقىت ءناسىرحان ۇلى.
ىزگى تىلەگىن ارناعان اۋدان اكىمى قازاق باتىرىنىڭ استىنا تۇلپار مىنگىزىپ، ۇستىنە شاپان جاپتى. سونداي-اق، قانات يسلاممەن بىرگە كەلگەن تۇيە پالۋان، «قازاقستان بارىسى» ءتۋرنيرىنىڭ جۇلدەگەرى جۇمانازار ەرسۇلتانوۆقا العىسىن ءبىلدىردى.
جيىن بارىسىندا قانات يسلام ماقتاارالدىق جاس بوكسشىلارعا اقىل-كەڭەسىن ايتىپ، ماستەر-كلاسس وتكىزدى. ماقتاارالداعى سپورت مەكتەپتەرىنىڭ تالىمگەرلەرى قازاق باتىرىمەن جاتتىعۋ جاساپ، ءدارىس ۇيرەندى. سونداي-اق، قانات يسلام ماقتاارال اگروكوللەدجىنە ايالداپ، ستۋدەنت جاستارمەن كەزدەستى. كەزدەسۋدە پاتريوتتىق تاقىرىپتاعى اڭگىمەلەر ايتىلىپ، ەركىن سۇحبات قۇرىلدى.
ايتا كەتەيىك، قانات يسلام 2012 جىلى «ارلاندار» ساپىنان كەتىپ، كاسىپقوي بوكسپەن اينالىسا باستادى. اقش-تىڭ پروموۋتەرلىك كومپانيالارىمەن كەلىسىم-شارتقا وتىرىپ، وسى ۋاقىتقا دەيىن 25 جەكپە جەك وتكىزەدى جانە ونىڭ بارلىعىن دا تۇگەلدەي جەڭىسپەن اياقتايدى. ونىڭ ىشىندە 20-سىن نوكاۋتپەن جەڭەدى.
ماقتاارال اۋدانى اكىمىنىڭ باسپا ءسوز قىزمەتى
