«الماتى وبلىسىنىڭ تالعار اۋدانىندا ءولىم-جىتىم سانى ارتقان. جۇرەك-قان تامىرلارى، ونكولوگيالىق اۋرۋلار مەن تۋبەركۋلەزدەن قايتىس بولۋ فاكتىلەرى كوبەيگەن. انا ولىمىنە دە جول بەرىلگەن. سوندىقتان اۋداننىڭ دەنساۋلىق ساقتاۋ سالاسىنا ارنايى كوميسسيا قۇرىپ، تالداۋ جاساۋ كەرەك». اۋداندىق، قالالىق اۋرۋحانالاردىڭ باس دارىگەرلەرىنىڭ قاتىسۋىمەن وتكەن الماتى وبلىس اكىمدىگىنىڭ ماجىلىسىندە قانات بوزىمبايەۆ وسىلاي دەدى.

سول سياقتى پانفيلوۆ، ەڭبەكشىقازاق، قاراتال اۋداندارى مەن قاپشاعاي قالاسىنىڭ دەنساۋلىق ساقتاۋ جۇيەسى دە قاتاڭ سىنعا الىندى.

اكىمدىك جيىنىندا 2021-2025 جىلدارعا ارنالعان «دەنى ساۋ ۇلت» ءاربىر ازامات ءۇشىن ساپالى جانە قولجەتىمدى دەنساۋلىق ساقتاۋ» ۇلتتىق جوباسىن ىسكە اسىرۋ تۋرالى ماسەلە قارالدى. وسى تاقىرىپتى تالداعان وبلىستىق دەنساۋلىق ساقتاۋ باسقارماسىنىڭ باسشىسى ءومىرزاق نيازبەكوۆ وڭىردەگى مەديسينالىق نىسانداردىڭ قۇرىلىسى مەن جوندەۋ جۇمىستارى، ولاردى ماتەريالدىق-تەحنيكالىق قامتاماسىز ەتۋ، الەۋمەتتىك ماڭىزداعى سىرقاتتاردى ەرتە كەزدەن انىقتاۋ شارالارى، مامان تاپشىلىعىن بولدىرماۋ جانە باسقا دا ماسەلەلەرگە كەڭىنەن توقتالدى.

ماسەلەن، جالپى وبلىستا 834 ۇيىم مەديسينالىق قىزمەت كورسەتەدى، سونىڭ 753ء-ى – اۋىلدىق جەردە. ولاردى زاماناۋي جوعارى تەحنولوگيالى قۇرال-جابدىقتارمەن قامتۋ ءۇشىن بيىل 4،4 ملرد تەڭگە بولىنگەن. بۇل كورسەتكىش 2020 جىلمەن سالىستىرعاندا 79%-تەن 91%-كە ارتىپ وتىر.

بۇگىنگى كۇنى وبلىستاعى مەديسينالىق ۇيىمداردا 6 ماگنيتتىك-رەزونانستىق تاموگراف، 17 كومپيۋتەرلىك توموگراف، 4 انگيوگراف، 53 رەنتگەن اپپاراتى، 606 يۆل اپپاراتى بار. وتتەگى ستانساسىمەن 17 اۋرۋحانا قامتىلعان.

وڭىردە 4 580 دارىگەر جۇمىس ىستەيدى. ءالى دە 292 مامان قاجەت. سونىڭ ىشىندە تالدىقورعان قالاسىنا – 94، ەڭبەكشىقازاق اۋدانىنا – 33، كەربۇلاق اۋدانىنا 20 دارىگەر كەرەك. بۇل رەتتە اتالعان اۋدانداردىڭ باسشىلارى كادر تارتۋ ءۇشىن قاراستىرىپ جاتقان شارالارى – ماماندارعا تۇرعىن ءۇي بەرۋ، كوتەرمەاقى تولەۋ جايىن باياندادى.

سول سياقتى ماجىلىستە انا مەن بالا ولىمىنە ەرەكشە ءمان بەرىلدى. ءومىرزاق نيازبەكوۆتىڭ ايتۋىنشا، وبلىستا وتكەن جىلى 24 جاعداي تىركەلگەن. وسىعان جول بەرگەن ءبىر باس دارىگەر مەن باس دارىگەردىڭ ورىنباسارى جۇمىستان بوساتىلدى، مەديسينالىق ۇيىمداردىڭ 10 باسشىسىنا، 57 مامانىنا قاتاڭ سوگىس بەرىلدى. اكۋشەرلىك ءىس  بويىنشا رەسپۋبليكالىق اۋىر اكۋشەريا ورتالىعىنىڭ جانە كوۆيد-ورتالىعىنىڭ ماماندارىنان كونسۋلتاسيا الۋ جولعا قويىلعان. ماسەلەن، 2021 جىلى 116 رەت وسىنداي كونسۋلتاسيا الىندى. دەگەنمەن قابىلدانىپ وتىرعان شارالارعا قاراماستان تالعار، پانفيلوۆ، ەڭبەكشىقازاق، قاراتال اۋداندارى مەن قاپشاعاي قالاسىندا انا مەن بالا ءولىمى ورىن العان.



وبلىس اكىمى اتالعان ايماقتاردىڭ باس دارىگەرلەرىن كەزەگىمەن تۇرعىزىپ، جاۋاپ بەرۋلەرىن تالاپ ەتتى. ولاردىڭ كوپشىلىگى ايەلدەردىڭ دەر كەزىندە تىركەۋگە تۇرمايتىنىن، انەميا جانە باسقا دا سىرقاتتارىنان ۋاقىتىلى ەمدەلمەيتىنىن، جۇكتى ايەلدەردىڭ كوروناۆيرۋس جۇقتىرۋ فاكتىلەرى اسەر ەتكەنىن العا تارتتى.

سول سياقتى مۇنداي جاعدايدى بولدىرماۋعا ىقپال ەتەتىن شارا رەتىندە سوڭعى كەزدە ساتىپ الىنعان زاماناۋي قۇرالدارى جايلى دا ايتتى. جاۋاپتارعا قاناعاتتانباعان قانات بوزىمبايەۆ:

– ادام ءولىمى، انا مەن بالا ءولىمى بولماۋى ءتيىس، ولار ءومىر ءسۇرۋى كەرەك! ءبارىڭىز كوروناۆيرۋستى سىلتاۋ ەتىپ وتىرسىزدار. ىندەت سىزدەرگە عانا كەلگەن جوق، بۇكىل ەلدە بولدى. باسقا اۋداندار دا كوۆيد جاعدايىندا جۇمىس ىستەدى. ولاردىڭ كادرلارى سىزدەردىڭ دارىگەرلەرگە قاراعاندا تاجىريبەلى شىعار، مۇمكىن. سوناۋ شالعاي اۋداندار – كەگەن، رايىمبەكتە، ماسەلەن، انا مەن بالا ءولىمى بولعان جوق. سىزدەر مەگاپوليستىڭ جانىندا وتىرىپ، سونداي فاكتىلەرگە جول بەرىپ وتىرسىزدار.

مىسالى، تالعار اۋدانىنىڭ اۋرۋحاناسى جەكەگە وتكەلى عيماراتتى جوندەۋ، جابدىقتاۋ جاعىنان ىلگەرىلەۋ بولعانىمەن، قىزمەت كورسەتۋ ساپاسى تومەندەدى. بىزگە ەڭ الدىمەن ينۆەستيسيا ەمەس، ادامنىڭ ءومىرى كەرەك!

بارىڭىزگە قاتاڭ ەسكەرتەمىن، جۇمىس ىستەڭىزدەر! جەرگىلىكتى وكرۋگ اكىمدەرى جۇكتى ايەلدەردى تىركەۋگە ۋاقىتىلى الۋدا دارىگەرلەرگە كومەكتەسسىن. ءبىز دەنساۋلىق ساقتاۋ سالاسىنا كادر تارتۋ، قارجىلاي قولداۋ، ماتەريالدىق بازانى نىعايتۋ جاعىنان قولداۋ كورسەتەمىز جانە سوعان سايكەس سىزدەردەن وڭ ناتيجە تالاپ ەتەتىن بولامىز! – دەدى قانات بوزىمبايەۆ.