قازاقستان دەنساۋلىق ساقتاۋ مينيسترلىگىنە قاراستى سانيتاريالىق-ەپيدەميولوگيالىق باقىلاۋ كوميتەتى الەۋمەتتىك جەلىلەردە تاراعان Oreo پەچەنەسىنىڭ سالماسى "پلاستيكتەن جاسالعان" جانە ءونىم "قان تامىرلارىن بىتەيدى" دەگەن اقپاراتتى جوققا شىعاردى. ۆەدومستۆو بۇل مالىمدەمەلەردىڭ عىلىمي دالەلى جوق ەكەنىن اتاپ ءوتتى، دەپ حابارلايدى Dalanews.kz.

كوميتەتتىڭ حابارلاۋىنشا، 2025 جىلى اتالعان ونىمگە زەرتحانالىق تالداۋلار جۇرگىزىلگەن. تەكسەرۋ ناتيجەسىندە ميكروبيولوگيالىق جانە توكسيكولوگيالىق نورمالاردىڭ ساقتالعانى بەلگىلى بولدى. سونىمەن قاتار پەچەنەنىڭ تاڭبالانۋى قولدانىستاعى تالاپتارعا تولىق ساي كەلەدى. وسىعان بايلانىستى مينيسترلىك ازاماتتاردى تەك رەسمي اقپارات كوزدەرىنە سەنۋگە شاقىردى.