جيىن بارىسىندا ءسوز العان ق. ساتبايەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ رەكتورى، اكادەميك جەكسەنبەك ءادىلوۆ ءبىلىم ورداسىنىڭ تۇلەكتەرى ەلىمىزدىڭ تاۋ-كەن جانە مەتاللۋرگيا سالاسىن دامىتۋعا بارىنشا ۇلەس قوسقانىن العا تارتى.
– ءقازىر ءبىزدىڭ ۋنيۆەرسيتەتتەن تۇلەپ ۇشقان 120 مىڭنان استام تۇلەكتەرىمىز قازاقستاننىڭ گۇلدەنۋى جولىندا ايانباي ەڭبەك ەتۋدە. ەلىمىزدە ەڭبەك قوعامىن قالىپتاستىرۋدا ۋنيۆەرسيتەت تۇلەكتەرى قاشاندا الدىڭعى ورىندا كەلەدى. تاۋ-كەن سالاسى ماماندارى، مەتاللۋرگتەر، گەولوگ، مۇنايشىلار، ماشينا جاساۋشىلار، ەنەرگەتيكتەر ءوندىرىس الاڭدارىندا وتانىمىزدىڭ كەلىستى كەلەشەگى ءۇشىن بار كۇش-جىگەرىن جۇمساۋدا. قازاقستان ءۇشىن ماڭىزدى تاۋ-كەن، مۇناي ونەركاسىبى سالاسىنداعى قالدىقتارىن كادەگە جاراتۋ مەن وڭدەۋ تاقىرىبىندا سەميناردىڭ ءوتۋى كەزدەيسوق جاعداي ەمەس، – دەدى رەكتور.
سەمينار بارىسىندا قازۇتۋ-دىڭ اقپاراتتىق-ستراتەگيالىق ارىپتەستىك جانە دامىتۋ دەپارتامەنتى ديرەكتورى گۇلنار سارسەنبايەۆا اتالمىش تاقىرىپقا قاتىستى اعىلشىن تىلىندە بايانداما جاساسا، ۇلىبريتانياداعى ۆۋلۆەرحەمپتون ۋنيۆەرسيتەتىنىڭ پروفەسسورى جامال حاتيب جينالعان قاۋىمدى سەمينار باعدارلاماسىمەن تانىستىردى. باسقوسۋ ەكى ەل اراسىنداعى عىلىمي ارىپتەستىكتى دامىتۋدى كوزدەيدى.
بەس كۇنگە سوزىلعان سەمينار بارىسىندا ءوندىرىس قالدىقتارىن قايتا وڭدەۋ، قورشاعان ورتاعا تەحنوگەندىك اسەرلەردى ازايتۋ ماسەلەلەرى كەڭىنەن تالقىلانىپ، ولاردى قۇرىلىستا (ينفراقۇرىلىمدا) قولدانۋ، ءار ءتۇرلى ماتەريالدار جاساۋ، اعىندى سۋدى وڭدەۋ مۇمكىندىكتەرىنە ەرەكشە نازار اۋدارىلعانىنا كۋا بولدىق.
جۇلدىز باعاشاروۆا،
قازۇتۋ-دىڭ باسپا ءسوز حاتشىسى.
