بەلگىلى اقىن قۇديار ءبىلال ءوزىنىڭ فەيسبۋكتاعى پاراقشاسىندا ءقازىر الەمدە پۋتينگە تەڭ كەلەتىن ساياساتكەر جوق ەكەنىن ايتىپتى. ءتىپتى، ءپۋتيننىڭ جانىندا بايدەننىڭ ءوزى بالا سياقتى دەسە، ەۋروپا ەلدەرىنىڭ باسشىلارى شەتىنەن قىزتەكە دەپ سويىپ سالىپتى.

– ءبىز قالايىق، قالامايىق، شىندىقتىڭ بەتىنە تۋرا قاراعاندا، ءدال بۇگىنگى كۇنى پۋتين الەمدىك دەڭگەيدەگى ءبىرىنشى ءنومىرلى ليدەر. ونىڭ قاسىندا بايدەننىڭ ءوزى بالا. سىرتتاي قانشا كىجىنگەنمەن، بەتپە-بەت كەلگەندە ونىڭ دا تىزەسى دىرىلدەيدى. وزىندە دە، سوزىندە دە سەس جوق. ال ەۋروپا كوسەمدەرى بولسا، شەتىنەن قىزتەكە. بىردە بىرەۋىندە ەركەكتىك مىنەز بايقالمايدى. ولارعا قاراعاندا لۋكاشەنكو ءتاۋىر. ونىڭ دا ءبىر ايتارى بار. زەلەنسكيي بولسا، ءارتىس. پۋتينمەن شەندەسەتىن تەك جۇڭگو كوسەمى عانا. ونىڭ ءوزى ورىسقا دوستىق پەيىل تانىتادى.

قۇدايشىلىعىنا كەلسەك، يادرولىق قارۋدىڭ قىزىعىن كەشەگى كسرو-دان كەيىن كورگەن وسى پۋتەكەڭ. بۇكىل الەمگە «كەلسەڭ كەل» دەپ ايبات شەگىپ وتىرعانى سوندىقتان.

شىنتۋايتىنا كەلگەندە، ءدال وسىلاي ايبات شەگە الماسا، ول «تەمىر-تەرسەكتىڭ» نە كەرەگى بار؟ الايدا ونداي مىنەز تانىتۋ ءۇشىن دە ءبىرىنشى ءنومىرلى ليدەر بولۋ كەرەك. ال پۋتين سول ادام. راس، وسىدان ونشاقتى جىل بۇرىن وسىنداي تەكە-تىرەستە ونىڭ دا داۋسى قىڭسىلاپ شىعاتىن. ال ءقازىر باسقا. مىناۋ مۇلدە وزگە پۋتين.

ءپۋتيندى ماقتاعىم جوق. ءبىراق شىندىق قىمبات. مەن دە ەرتەڭگى كۇنى بولۋى مۇمكىن سوعىستا رەسەيدىڭ بىت-شىت بولىپ جەڭىلگەنىن قالايمىن. ءتىپتى، بولشەكتەۋگە تۇسسە ەكەن دەپ تە ارماندايمىن.

ءبىز تەك سول كەزدە عانا شىنايى تاۋەلسىزدىككە قول جەتكىزەر ەدىك. ەڭ بولماعاندا الداعى كۇندەرى سالىنۋى مۇمكىن سۇمدىق سانكسيالاردان ەكونوميكاسى مۇلدە قۇلدىراپ، حالقى تەزەك تەرىپ كەتسە ەكەن دەپ تە قيالداپ قويامىن. سول كەزدە ءپۋتيننىڭ ءوزى تىعىلاتىن جەر تاپپاي قالار ەدى.

ءبىراق ولاي بولمايدى. رەسەي ۋكراينانى جاۋلاپ الادى. ناتو قاشانعىسىنداي ويىننان تىس قالادى. شىنتۋايتىنا كەلگەندە، ولارعا دا جان كەرەك. ەۋروپا سوعىسقا ارالاسپايدى. سەبەبى، ءبارى دە يادرولىق قارۋدان اياق تارتادى.

ال رەسەي كۇننەن-كۇنگە ايبارلانا تۇسەدى. قىتايمەن وداقتاسادى. نە كەرەك، جاڭا تۇرپاتتاعى كسرو-نى قايتا قالىپتاستىرادى. بۇل – اقيقات. ال وعان كىم قارسى تۇرا الادى؟! ءوز باسىم قارسى تۇرا الاتىن بىرەۋ-مىرەۋدى كورىپ تۇرعانىم جوق. راس، امەريكا باستاعان كۇشتىڭ رەسەيدى بولشەكتەپ تاستاۋعا كۇشى جەتەدى. ءبىراق وعان ەشقايسىسى دا تاۋەكەل ەتە المايدى. سەبەبى، ليدەر ەمەس.

جالعىز عانا ءۇمىت بار. ول – اللا. ءوز باسىم اللا تاعالا قازاق باسىنا ءتۇسۋى مۇمكىن مۇنداي قاسىرەتكە جول بەرمەيدى دەپ ويلايمىن. ءبىراق قالاي جول بەرمەيدى؟ ونى بىلمەيمىن. ءبىلۋشى – اللا.