"بۇل تۋرالى قانشا رەت ايتۋعا بولادى (كۇلدى). مۇندايدى اشىپ ايتۋعا بولمايدى. ەشكىمگە بۇل جايىنان ءتىس جارىپ، ايتپادىم. تەك سول كۇنى تاڭەرتەڭ، قالاي دەگەنمەن دە ۇلكەن كورشىمىز عوي، پۋتينگە قوڭىراۋ شالدىم، ول ەسەڭگىرەپ قالدى، ايتىپ جاتىرمىن، بۇگىن كەشكە جاريالايمىز دەيمىن، سولاي شەشتىم، ءوز اۋزىمنان ەستىسىن دەپ ايتىپ جاتىرمىن، سونىمەن ءبىتتى!
مەملەكەت باسشىلارى ىشىنەن ودان باسقاسىنىڭ ەشقايسىسى بىلگەن جوق. ونىڭ ۇستىنە بۇل شەشىم الدىندا - 2015 جىلى ءپىسىرىلىپ قويعان بولاتىن. 75 جىلدىق مەرەيتويىم ءوتتى، سول كەزدە وسى مەن ءۇشىن جەتكىلىكتى شەك دەپ شەشتىم. قازاقستان حالىقتارى اسسامبلەياسى مەنىڭ قىزمەتىمدى سايلاۋسىز ءومىر بويىنا ۇزارتۋ ءۇشىن بۇكىل قازاقستان بويىنشا قول جينادى"، - دەدى نازاربايەۆ.
ونىڭ ايتۋىنشا، سول كەزدە ءوزىنىڭ قارسىلىعىنا قاراماستان بۇكىل ەل بويىنشا 5 ميلليون قول جينالدى، بۇل سايلاۋشىلاردىڭ 65% قۇرايدى.
"ءبىر سوزبەن ايتقاندا، مەن ءقازىردىڭ وزىندە سايلانىپ قويعانمىن دەپ ايتۋعا بولادى. سودان تۇردىم دا ايتتىم: "جارايدى، ءبىز كەزەكتەن تىس سايلاۋ وتكىزەتىنىمىزدى جاريالايمىز، ادامدار ءوز پىكىرىن ءبىلدىرسىن" دەدىم. العاشقى جالپىحالىقتىق سايلاۋ 1991 جىلى ءوتتى - 98،8%. سوڭعىسى - 2015 جىلى: 97،8%. سەنىم وسىنداي بولدى، 80% -دان تومەندەگەن ەمەس. ەگەر كىم دە كىم ويدان الىنعان سان دەپ ايتسا، سولاي-اق ويلاي بەرسىن، ءبىراق بۇل 60% ەمەس، 51% ەمەس، قالاي 80 نەمەسە 90%-دى جازىپ الۋعا بولادى.
2015 جىلى ادامدار داۋىس بەرۋ ءۇشىن كەزەككە تۇردى. ءومىر بويىنا ادامداردىڭ وسىنداي سەنىمىنە يە بولعانىم، ارينە جانىمدى تەبىرەنتتى.
مىنە، وزىمە دەگەن سەنىمنىڭ وسىنداي شىڭىندا كەتۋىمە تۋرا كەلدى. سوندىقتان، وسىلاي ىستەۋ كەرەك دەپ سانادىم. مەنىڭ كوز الدىمدا كسرو باسشىلارىنىڭ ءبىرقاتارى ءوتتى. برەجنيەۆتىڭ، اندروپوۆتىڭ جانە چەرنەنكونىڭ جەرلەۋ راسىمىنە قاتىستىم، بۇل ءبىر جاعىنان. ەكىنشى جاعىنان، ادامي مۇمكىندىكتەردىڭ دە شەگى بار عوي"، - دەپ ءتۇسىندىردى ەلباسى.
ول وتستاۆكاعا كەتۋىنە قوسىمشا تاعى ءبىر سەبەپ بولعانىن، ياعني ومىرتقاسىن ەمدەتۋ قاجەت بولعانىن ايتتى.
"بۇل تۋرالى ەشقاشان ايتقان ەمەسپىن، ەندى عانا ايتىپ وتىرمىن، مەنىڭ ومىرتقاما وتا جاسالدى. وتە اۋىر وتا ەدى. 8 ناۋرىزدا كونسەرتكە باردىق. ءبىر ۋاقىتتا كونسەرت اياقتالدى. مەن ورنىمنان تۇردىم، سونىمەن ءبىتتى، اياعىم قوزعالمايدى. قاتىپ قالعان. سودان كۇزەتشىنى شاقىردىم. "قاسىما تۇر!" دەدىم. بالداق سياقتى ونىڭ قولىنان ۇستاپ الدىم. "ەندى اقىرىنداپ جىلجيىق، ادامدار بايقاپ قويماسىن" دەدىم، زال تولى بولاتىن. ءسويتىپ شىعىپ كەتتىك.
سويتسەم ومىرتقامدا ءبىر كىلتيپان بارى بەلگىلى بولدى. وتا جاسادى. سولاي ەمدەلىپ الدىم. ءقازىر ءبارى جاقسى.
بالا كەزىمدە قىزىلداردىڭ كومانديرى تۋرالى فيلم كورگەنمىن، سوندا ول جارالانادى، ال وترياد شابۋىلعا شىعۋى ءتيىس، ءبىراق وعان قيمىلداۋعا مۇلدە بولمايدى، سول كەزدە ول جاراسىن ءوزىن تارتىپ تاڭىپ، اياعىنان تۇرىپ، "كوماندير كەز كەلگەن جاعدايدا اق اتتىڭ ۇستىندە، قولدىڭ باسىندا بولۋى كەرەك" دەپ ايتادى"، - دەپ ەسكە الدى ق ر تۇڭعىش پرەزيدەنتى.
ونىڭ پىكىرىنشە، پرەزيدەنت ءۇشىن سولاي بولۋى كەرەك.
"پرەزيدەنت ناۋقاستانسا، ول مەملەكەت باسشىسى ەمەس. بۇل ءسىزدىڭ جاعدايىڭىز، ال مەملەكەتتىڭ بۇعان نە قاتىسى بار، ول زارداپ شەكپەۋى كەرەك قوي، وسىلاي ساپارلاپ جۇرە بەرەسىز بە، قانشاما كەزدەسۋ بار، 350 كەزدەسۋ، كوز الدىڭىزعا ەلەستەتە الاسىز با؟! ال مۇنداي دەنساۋلىقپەن قايدا باراسىز؟ بۇل 2011 جىل بولاتىن. سودان كەيىن تاعى جوندەلۋگە تۋرا كەلدى، ول دا قيىن وتا ەدى. جاقسى حيرۋرگ كەزىكتى. تاجىريبەلى. مىنە، وسى جايتتار دا مەنىڭ شەشىمىمە اسەر ەتتى. بۇل تۋرالى مەن ەشقاشان ايتقان ەمەسپىن، ول ءۇشىن كەشىرەرسىزدەر. ەندى ونى قالاي ايتاسىز، جۇمىس ىستەۋ كەرەك، ءالى دە كەتۋگە دايىن ەمەس ەدىم، ويتكەنى مۇراگەر ماسەلەسى شەشىلمەگەن بولاتىن. اقىرى ءبىر شەشىمگە كەلدىم، ونىم دۇرىس بولدى دەپ ويلايمىن. سودان بەرى ەكى جىلدان استام ۋاقىت ءوتتى، وعان ەش وكىنبەيمىن. وسى جاعدايدان باسقا دەرتىم بولعان ەمەس، ءقازىر دە اۋىرىپ جۇرگەنىم جوق"، - دەپ ءسوزىن قورىتىندىلادى نازاربايەۆ.
https://youtu.be/4bZMn989a18
تاعى وقىڭىز:
https://dalanews.kz/news/69350-nur-otan-medicina-qyzmetkerlerining-kasib
