ۆلاديمير پۋتين مەن دونال ترامپ جاقىن ۋاقىتتا تەلەفون ارقىلى سويلەسەدى. بۇل تۋرالى رەسەي پرەزيدەنتىنىڭ باسپا ءسوز حاتشىسى دميتريي پەسكوۆ مالىمدەدى، دەپ حابارلايدى Dalanews.kz.

ونىڭ ايتۋىنشا، كرەمل ازىرگە ۋكراينا پرەزيدەنتى ۆلاديمير زەلەنسكيي مەن اقش پرەزيدەنتى دونالد ترامپ اراسىنداعى اڭگىمەنىڭ قالاي وتكەنىنەن بەيحابار. دەگەنمەن پەسكوۆ ترامپتىڭ «بەيبىتشىلىك بۇرىنعىدان دا جاقىنداي ءتۇستى» دەگەن پىكىرىنە قوسىلاتىنىن ايتتى.

ال ۆلاديمير زەلەنسكيي مەن ۆلاديمير پۋتين اراسىنداعى ىقتيمال تەلەفون قوڭىراۋىنا قاتىستى اڭگىمە ازىرگە جوق. پەسكوۆتىڭ سوزىنشە، بولاشاق بەيبىت كەلىسىمنىڭ ەگجەي-تەگجەيىن تالقىلاۋعا ءالى ەرتە.

بۇعان دەيىن زەلەنسكيي دونالد ترامپتان ۇزاقمەرزىمدى قاۋىپسىزدىك كەپىلدىكتەرىن سۇراعانى بەلگىلى بولدى. ۋكراين پرەزيدەنتى كەپىلدىكتەردىڭ مەرزىمى 30، 40، ءتىپتى 50 جىلعا دەيىن بولعانىن قالايتىنىن ايتقان.

"كەپىلدىكتەردىڭ مۇمكىندىگىنشە ۇزاق مەرزىمگە بەرىلگەنىن قالار ەدىك. مەن وعان 30، 40، 50 جىلدىق نۇسقانى قاراستىرۋدى سۇرادىم"، – دەپ كەلتىرەدى زەلەنسكييدىڭ ءسوزىن «نوۆوستي.live».

زەلەنسكيي مۇنداي شەشىم تاريحي ماڭىزعا يە بولاتىنىن اتاپ ءوتتى. سونداي-اق ونىڭ ايتۋىنشا، اقش پرەزيدەنتى بۇل ۇسىنىس تۋرالى ويلانۋعا ۋادە بەرگەن.