رەسەي پرەزيدەنتى ۆلاديمير پۋتين ۋكراينانى رەسەيدىڭ اجىراماس بولىگى رەتىندە قابىلدايدى جانە وعان ۋكراين جەرىنىڭ ءبىر بولىگىن عانا يەمدەنۋ جەتكىلىكسىز. بۇل تۋرالى اقش-تىڭ بۇرىنعى پرەزيدەنتى دجو بايدەن BBC News-كە بەرگەن سۇحباتىندا مالىمدەدى، دەپ حابارلايدى Dalanews.kz.
بايدەننىڭ ايتۋىنشا، رەسەيگە ۋكراينا جەرىنىڭ ءبىر بولىگىن بەرۋگە كەلىسۋ – “زاماناۋي باسۋ، تىيىم سالۋ” (ياعني، اگرەسسوردى تىنىشتاندىرۋ) ساياساتىنىڭ كورىنىسى. ول ءپۋتيننىڭ ماقساتى – كەڭەس وداعى كەزىندەگى ىقپالىن قالپىنا كەلتىرۋ ەكەنىن جەتكىزدى.
“ول كەڭەس وداعىنىڭ ىدىراعانىن مويىنداعىسى كەلمەيدى. ال ەگەر بىرەۋ ونىڭ وسى ارەكەتتەرىن توقتاتادى دەپ ويلاسا — ول ادام اقىماق”، — دەدى بايدەن.
سونداي-اق ول دونالد ترامپتىڭ بيلىككە قايتا ورالۋى اقش پەن ەۋروپا اراسىنداعى قارىم-قاتىناستى ناشارلاتۋى مۇمكىن ەكەنىن ەسكەرتتى. بايدەننىڭ پايىمىنشا، مۇنداي سەناريي الەم تاريحىن تۇبەگەيلى وزگەرتۋى مۇمكىن.
ايتا كەتەيىك، بۇل — بايدەننىڭ اق ۇيدەن كەتكەننەن كەيىنگى العاشقى سۇحباتى.
اقش ۇسىنعان بەيبىت جوسپاردىڭ مازمۇنى قانداي؟
ءساۋىر ايىندا پاريجدە وتكەن كەزدەسۋدە اقش دەلەگاسياسى ۋكراينا مەن ەۋروپا ەلدەرىنە رەسەي مەن ۋكراينا اراسىنداعى سوعىستى توقتاتۋ جونىندەگى ۇسىنىس-جوسپارىن ۇسىندى.
وعان سايكەس:
• قۇراما شتاتتار قىرىمدى رەسەيدىڭ ءبىر بولىگى رەتىندە دە-يۋرە (زاڭ جۇزىندە) مويىنداۋعا دايىن؛
• 2022 جىلدىڭ اقپانىنان بەرى رەسەي اسكەرى باسىپ العان اۋماقتار رەسەيدىڭ باقىلاۋىندا قالماق، الايدا ولاردىڭ اننەكسياسى حالىقارالىق دەڭگەيدە مويىندالمايدى؛
• تەك حاركوۆ وبلىسىنىڭ ازداعان بولىگى عانا ۋكراينانىڭ باقىلاۋىنا قايتارىلۋى ءتيىس دەلىنگەن.
الايدا ۋكراينا پرەزيدەنتى ۆلاديمير زەلەنسكيي بۇل جوسپارمەن ۇزىلدى-كەسىلدى كەلىسپەيتىنىن ءبىلدىردى. ول كييەۆ ەشقاشان قىرىم مەن باسقا دا وككۋپاسيالانعان اۋماقتاردىڭ رەسەي يۋريسديكسياسىن مويىندامايتىنىن مالىمدەدى.
“مۇنداي ۇسىنىستار تەك سوعىستى سوزۋعا عانا الىپ كەلەدى”، — دەدى زەلەنسكيي.
