رەسەي پرەزيدەنتٸ ۆلاديمير پۋتين 2 جەلتوقساندا "باق تۋرالى" زاڭعا "شەتەل اگەنتتەرٸ" تٷسٸنٸگٸن ەنگٸزۋدٸ قاراستىراتىن قۇجاتقا قول قويدى.
جاڭا زاڭ "شەتەل اگەنتتەرٸ" تٸزٸمٸندەگٸ ۇيىمداردا ٸستەيتٸن جۋرناليستەردٸ "شەتەل اگەنتٸ" دەپ تانۋعا جول اشادى. شەتەل اقپارات قۇرالدارىندا جۇمىس ٸستەيتٸن, ولاردان قارجى الاتىن جەكە تۇلعالار دا "شەتەل اگەنتٸ" اتانادى.
شەتەلدٸك باق رەسەيدە جۇمىس ٸستەۋ تەرتٸبٸن بۇزعان جاعدايدا, قابىلدانعان ەرەجەلەر "شەتەل اگەنتتەرٸنٸڭ نەمەسە ولاردىڭ زاڭدى تۇلعالارىنىڭ سايتتارىن بۇعاتتاۋعا نەگٸز بولادى" دەپ جازدى تاسس.
رەسەيدە "شەتەل اگەنتتەرٸ تۋرالى" دەپ اتالىپ كەتكەن زاڭ 2012 جىلى قابىلداندى. قۇجات بويىنشا, شەتەلدەن قارجى الاتىن ۇيىمدار ارنايى تٸركەۋدەن ٶتۋٸ كەرەك. بۇل زاڭ پۋتين بيلٸگٸنە قارسى نارازىلىقتار كٷشەيگەن تۇستا قابىلدانعان ەدٸ.
حالىقارالىق ۇيىمدار رەسەي بيلٸگٸن بۇل زاڭنان باس تارتۋعا شاقىرعان.
رەسەيدٸڭ ەدٸلەت مينيسترلٸگٸ "شەتەل اگەنتتەرٸ" تٸزٸمٸنە "امەريكا داۋىسى" مەن ازات ەۋروپا/ازاتتىق راديوسى مەدياكورپوراتسيياسىنىڭ توعىز رەداكتسيياسىن ەنگٸزگەن. اە/ار پرەزيدەنتٸ دجەيمي فلاي بۇل زاڭدى "قاۋٸپتٸ" دەپ اتاعان ەدٸ.
