پۋتين تەلەارنالار ارقىلى جاساعان ۇندەۋىندە «دونباستاعى جاعداي مەن ۋكرايناداعى اسىرە ۇلتشىلدارعا باعىتتالعان ارنايى اسكەري وپەراسيانى كۇشەيتۋ ماقساتىندا جارتىلاي اسكەري موبيليزاسيا جاريالايمىز» دەدى. ەندى اسكەري تاجىريبەدەن وتكەن رەسەي ازاماتتارى قولدارىنا قارۋ الىپ، مايدان دالاسىنا اتتانۋى ءتيىس.
ءوز كەزەگىندە پۋتين مىڭ شاقىرىمعا سوزىلاتىن مايدان شەبىندە ورىس اسكەرى تەك قانا اسىرە ۇلتشىلدارمەن عانا ەمەس باتىس ەلدەرىنىڭ اسكەري ماشيناسىمەن دە كۇرەسىپ جاتقانىن ايتتى. وسىلايشا ول رەسەي اسكەرى تۇتاس ناتو اسكەرمەنى بەتپە بەت كەلگەنىن ەسكەرتىپ، اسكەري موبيلزاسيانى اقتاۋعا تىرىستى.
جاريالانعان موبيليزاسيا بويىنشا زاپاستاعى اسكەريلەر سوعىسقا شاقىرىلماقشى.
– جارتىلاي اسكەري موبيليزاسيا ىس-تاجىريبەسى بار زاپاستا تۇرعان اسكەريلەردى قامتيدى. اسكەرگە شاقىرىلعان ازاماتتاردىڭ ءبارى قايتادان قىسقا مەرزىمدى اسكەري دايىندىقتان وتەتىن بولادى، – دەدى پۋتين.
وسى رەتتە جارتىلاي اسكەري موبيليزاسيا جاساۋ تۋراسىنداعى ۇسىنىستى پۋتينگە قورعانىس مينيسترلىگى مەن باس شتابتىڭ اسكەريلەرى ۇسىنعانىن ايتا كەتۋىمىز كەرەك.
پۋتين اسكەرگە شاقىرىلعان ازاماتتاردىڭ بارىنە ءتيىستى تولەمدەر تولەنەتىنىن جانە اسكەري موبيليزاسيانىڭ جاريالانعان ساتتەن باستاپ ەل اۋماعىنداعى ءوندىرىس ورىندارىنىڭ جۇمىسىن سوعىس جاعدايىنا اۋىساتىنىن ەسكەرتتى.
