ول ەلدە پلاستيكالىق حيرۋرگيانىڭ جاقسى دامىعانىن ەستىگەنبىز. ءتىپتى اكە-شەشەسى قىزدارىنا ادەمى بولسىن دەپ، وپەراسيا جاساتۋعا كونۆەرت بەرەتىن داستۇرلەرى دە بار. ءبىزدى قىزىقتىرعانى بەت-الپەتىڭدى وزگەرتۋ عانا ەمەس، حيرۋرگيا، نەيروحيرۋرگيا جانە وتباسىلىق مەديسينا تاقىرىبى بولدى.
ءبىزدىڭ دارىگەرلەر مەن ماماندار ولاردان بەدەۋلىكتى ەمدەۋ، گينەكولوگيا جانە مەديسينالىق تۋريزم سالاسىنان دارىس-كەڭەس الدى. مەديسينالىق تۋريزم دەمەكشى، بۇل سالا بىزدە اجەپتاۋىر دامىعان.
سوندىقتان دا باسقوسۋدىڭ، تاجىريبە الماسۋدىڭ وتكىزىلگەن ورنى وسى سالا ابدەن جولعا قويىلعان «Almaty Resort» شيپاجايى بولۋى دا زاڭدىلىق. كورەيلەر شيپاجايدا مەديسينالىق تۋريزمگە قاتىستى كورمەنى دە كورسەتتى. كورسەتىپ قانا قويماي، الدارىنا بارعان الماتىلىقتارعا تەگىن كەڭەس بەرىپ جاتتى.
«قازاقستاننىڭ كورەيلەر قاۋىمداستىعى» دا سوندا ءجۇر. ءبىر بىرىمەن كورەيشە ەمەس، ورىسشا نەمەسە اۋدارماشى ارقىلى سويلەسكەندەرى تاڭسىق كورىنەدى ەكەن. بۇل باسقا تاقىرىپ. باستى تاقىرىپ – پۋسان قالاسىنىڭ ەكونوميكالىق دامۋ اگەنتتىگى مەن قازاقستان مەديسينالىق مەكەمەلەرى اراسىنداعى ىنتىماقتاستىق تۋرالى مەموراندۋم بولدى.
كورەيلەردەن مەديسينا جاعىنان ۇيرەنەرىمىز كوپ. الماتى مەن پۋسان قالاسى اراسىنداعى بايلانىس ارى قاراي دا دامىپ، وسىدان بىلاي دا مەديسينا قىزمەتكەرلەرى ەكى ەلدە الما-كەزەك باس قوسىپ، تاجىريبە الماسىپ تۇرۋعا ۋاعدالاستى.
