استانادا ق ر ۇلتتىق مۋزەيىنىڭ بۇرىنعى ديرەكتورى، ەكس-مادەنيەت جانە سپورت ءمينيسترى ارىستانبەك مۇحامەديۇلىنا قاتىستى كەزەكتى سوت پروسەسى ءوتىپ جاتىر. سوت تالقىلاۋى كەزىندە پروكۋرور ونى 12 جىلعا باس بوستاندىعىنان ايىرۋدى سۇرادى، دەپ حابارلايدى Dalanews.kz.
مەملەكەتتىك ايىپتاۋشى ولجاس حايرۋللايەۆ مۇحامەديۇلىن قىلمىستىق كودەكستىڭ بىرنەشە بابى بويىنشا ايىپتى دەپ تانۋىن سۇرادى. ونىڭ ىشىندە قىلمىستى ۇيىمداستىرۋ، بوتەن ادامنىڭ سەنىپ تاپسىرعان مۇلكىن اسا ءىرى كولەمدە يەمدەنۋ نەمەسە جىمقىرۋ، اۋىر زارداپتارعا اكەپ سوقتىراتىن لاۋازىمدىق وكىلەتتىكتەردى اسىرا پايدالانۋ، قىلمىسقا وقتالۋ جانە رەيدەرلىك ارەكەتتەر بار.
"ارىستانبەك مۇحامەدي ۇلى مەملەكەتتىك قىزمەتتە جانە كۆازيمەملەكەتتىك سەكتوردا لاۋازىمداردى اتقارۋ قۇقىعىنان ءومىر بويىنا شەتتەتىلىپ، 12 جىلعا باس بوستاندىعىنان ايىرىلادى. جازاسىن قاۋىپسىزدىگى ورتاشا تۇزەۋ مەكەمەسىندە وتەيتىن بولادى"،- دەدى ولجاس حايرۋللايەۆ.
سونىمەن قاتار پروكۋرور مۇحامەدي ۇلىنىڭ سىبايلاستارىنا دا ءتۇرلى جازا تاعايىنداۋدى سۇرادى.
ەسكە سالايىق، 13 اقپاندا استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتى ق ر ۇلتتىق مۋزەيىنىڭ بۇرىنعى ديرەكتورى، ەكس مادەنيەت جانە سپورت ءمينيسترى ارىستانبەك مۇحامەديۇلىنا قاتىستى ۇكىم شىعارعان بولاتىن. ول اسا ءىرى كولەمدە پارا الۋعا ارەكەتتەنگەنى ءۇشىن كىنالى دەپ تانىلدى.
