مەملەكەت باسشىسى سۋ شارۋاشىلىعى سالاسىنىڭ قىزمەتكەرلەرىن ماراپاتتادى، دەپ حابارلايدى Dalanews.kz.

پرەزيدەنت سۋ شارۋاشىلىعى قىزمەتكەرلەرىن كاسىبي مەرەكەسىمەن قۇتتىقتاپ، سۋ – بۇكىل تىرشىلىكتىڭ كوزى، الەمدەگى بارلىق ەل ءۇشىن اسا ماڭىزدى ستراتەگيالىق رەسۋرس ەكەنىن ايتتى.

"ءبىزدىڭ كەڭ بايتاق جەرىمىز بار. الايدا ەل اۋماعىنىڭ جارتىسىنان كوبى - ءشول جانە شولەيت جەرلەر. سوندىقتان قازاقستان ءۇشىن سۋ ماسەلەسى ۇلتتىق قاۋىپسىزدىك ماسەلەسى دەسەك، ارتىق بولمايدى. بۇل سالا ءاردايىم مەملەكەتتىڭ ايرىقشا نازارىندا. 2023 جىلى حالىققا جولداۋىمدا مەن سۋدى ءتيىمدى پايدالانۋ جايىنا ەرەكشە توقتالدىم. ەلىمىزدە سۋ رەسۋرستارى جانە يرريگاسيا مينيسترلىگى قۇرىلدى. ناقتى مىندەتتەر ايقىندالىپ، اۋقىمدى رەفورمالار قولعا الىندى. جاڭا سۋ كودەكسى قابىلداندى. ءىرى ينفراقۇرىلىمدىق جوبالار جۇزەگە اسىرىلىپ جاتىر. سۋ نىساندارىن سالۋعا جانە قالپىنا كەلتىرۋگە قوماقتى قاراجات ءبولىندى. شەتەلدەن ينۆەستيسيا تارتىلىپ جاتىر. ءقازىر وسى سالادا 30 مىڭعا جۋىق ادام جۇمىس ىستەيدى. ولار قالا مەن اۋىلدى، وندىرىستەر مەن ەگىس القاپتارىن سۋمەن قامتاماسىز ەتىپ جاتىر"، – دەدى قاسىم-جومارت توقايەۆ.

پرەزيدەنت سۋ سالاسىندا مىقتى ماماندار ءالى دە جەتىسپەيتىنىن اتاپ ءوتتى.

"بىلتىر قازاق ۇلتتىق سۋ شارۋاشىلىعى جانە يرريگاسيا ۋنيۆەرسيتەتى قۇرىلدى. وسى ماماندىققا بولىنەتىن گرانت سانى ەكى ەسە ارتتى. 500-دەن اسا ستۋدەنت بيۋدجەت قارجىسىنا ءبىلىم الىپ جاتىر. ولار وقۋىن اياقتاعان سوڭ "ديپلوممەن – اۋىلعا" باعدارلاماسى اياسىندا جۇمىس ىستەي الادى. سونداي-اق، 120 قىزمەتكەر قىتايدا تاجىريبە الماسىپ، قوسىمشا ءبىلىم الىپ جاتىر. سۋ شارۋاشىلىعى ماماندارىنىڭ الەۋمەتتىك جاعدايىن جاقسارتۋعا باسا ءمان بەرىلىپ جاتىر. بىلتىر ولاردىڭ جالاقىسى 25 پايىزعا ءوستى. بيىل دا كوبەيەدى. ءبىر سوزبەن ايتساق، جۇيەلى جۇمىس ىستەلىپ جاتىر"، – دەدى مەملەكەت باسشىسى.