پرەزيدەنت قاسىم-جومارت توقايەۆ استانا حالىقارالىق فورۋمىندا قازاقستان ەكونوميكاسى تۋرالى ءسوز قوزعادى، دەپ حابارلايدى Dalanews.kz.
پرەزيدەنتتىڭ سوزىنشە، سوڭعى بىرنەشە جىلدا قازاقستاندا اۋقىمدى ەكونوميكالىق جانە ينستيتۋسيونالدىق رەفورمالار جۇرگىزىلدى.
"ءبىزدىڭ ماقساتىمىز ايقىن – بارىنشا ءارتاراپتاندىرىلعان، ينكليۋزيۆتى جانە كەلەشەككە باعدارلانعان ەكونوميكا قۇرۋ. ەكونوميكالىق ءوسىم ورنىقتى بولۋمەن قاتار، ونىڭ يگىلىگى ءار ازاماتقا ءادىل بولىنۋگە ءتيىس.
ەلىمىزدى تۇبەگەيلى جاڭعىرتىپ، ادىلەتتى قازاقستاننىڭ نەگىزىن قالاۋ ءۇشىن مەملەكەتتىلىكتى نىعايتۋعا كوپ كۇش-جىگەر جۇمساپ جاتىرمىز. جالپىۇلتتىق رەفەرەندۋم ارقىلى كونستيتۋسيامىزعا وزگەرىس ەنگىزىلىپ، باستى بيلىك ينستيتۋتتارىنا رەفورما جاسالدى. ءبىز سۋپەرپرەزيدەنتتىك جۇيەدەن باس تارتتىق. «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداسىن باسشىلىققا الاتىن، تەجەۋ مەن تەپە-تەڭدىك جۇيەسى بار پرەزيدەنتتىك رەسپۋبليكا جولىن تاڭدادىق. بۇل تۇجىرىم قازاقستانداعى ساياسي جۇيەنىڭ ەرەكشەلىكتەرىنە مەيلىنشە لايىقتى مودەل ەكەنىنە كامىل سەنەمىن"، - دەيدى پرەزيدەنت.
توقايەۆ پرەزيدەنت وكىلەتتىلىگى ءبىر رەتتىك 7 جىلدىق مەرزىممەن شەكتەلگەنىن اتاپ ءوتتى.
"مۇنداي شەشىم بۇرىن-سوڭدى قابىلدانباعان. مەنىڭ ويىمشا، بۇل قادام ەلىمىزدىڭ ساياسي جۇيەسىن نىعايتۋعا، ەكونوميكاسىن دامىتۋعا جانە وركەنيەتتى قوعام قۇرۋعا نەگىز بولادى.پرەزيدەنت – حالىقتىڭ بەلگىلى ءبىر مەرزىمگە، ءبىزدىڭ جاعدايىمىزدا جەتى جىلعا جالداعان مەنەدجەرى"، - دەيدى مەملەكەت باسشىسى.
