قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ قازاقستاندىقتاردى العىس ايتۋ كۇنىمەن قۇتتىقتادى، دەپ حابارلايدى Dalanews.kz
قۇرمەتتى وتانداستار!
سىزدەردى العىس ايتۋ كۇنىمەن قۇتتىقتايمىن! بۇل – حالقىمىزدىڭ ەڭ اسىل قۇندىلىقتارىن دارىپتەيتىن ەرەكشە مەرەكە. ءوزارا قۇرمەت كورسەتۋ، وزگەگە جاناشىرلىقپەن قاراپ، شىنايى تىلەۋلەس بولۋ – ۇلتىمىزدىڭ بويىنا سىڭگەن قاسيەتتەر. العىس ايتۋ ءداستۇرى ءتول رۋحانياتىمىزدىڭ تەمىرقازىعى رەتىندە ەل ىشىندەگى سەنىم مەن بىرلىكتى نىعايتۋعا زور ىقپال ەتىپ كەلەدى. جاقىندارىمىزعا العىس ايتۋ – ولارعا رۋحاني قولداۋ كورسەتۋ، قيىن كەزدە قول ۇشىن سوزۋ دەگەن ءسوز. قازىرگى قۇبىلمالى زاماندا بۇل قاسيەتتىڭ ءمان-ماڭىزى ەرەكشە، دەپ اتاپ ءوتتى پرەزيدەنت.
سونىمەن قاتار، وسى مەيرامدا قيىن-قىستاۋ جىلدارى ەلىمىزدى امان ساقتاپ، ۇرپاققا اسا قۇندى ءارى مول مۇرا قالدىرعان اتا-بابالارىمىزعا تاعزىم ەتۋدى، ۇستازدارعا، دارىگەرلەرگە، مادەنيەت سالاسى قىزمەتكەرلەرىنە، كاسىپكەرلەرگە، جۇمىسشىلارعا، ءتارتىپ ساقشىلارىنا، ءورت سوندىرۋشىلەرگە، قۇتقارۋشىلارعا جانە ادال ەڭبەگىمەن سۇيىكتى وتانىمىزدىڭ وسىپ-وركەندەۋىنە ەلەۋلى ۇلەس قوسىپ جۇرگەن بارشا ازاماتقا العىس ايتۋ كەرەگىن ايتتى.
سونداي-اق جاستارعا جانە ەرىكتىلەرگە ەرەكشە ريزاشىلىق ءبىلدىردى. بەلسەندى ازاماتتىق ۇستانىمى بار، قوعام يگىلىگى ءۇشىن ەڭبەك ەتۋگە ءازىر، مۇقتاج جاندارعا كومەكتەسۋگە دايىن ادامداردىڭ ەڭبەگى ەرەن ەكەنىن، بۇل وتانشىلدىقتىڭ ايقىن كورىنىسى دەدى توقايەۆ.
العىس ايتۋ كۇنى ەل تاعدىرى ءاربىر ازاماتتىڭ قولىندا ەكەنىن اڭعارتادى. سەبەبى الداعى وزگەرىستەردىڭ تابىستى جۇزەگە اسىرىلۋى جۇرتىمىزدىڭ بىرلىگىنە، پاراساتتىلىعىنا جانە سانالى ازاماتتىق ۇستانىمىنا بايلانىستى ەكەنى ءسوزسىز. ءبىز زاڭ مەن ءتارتىپ، تىلەكتەستىك پەن ىنتىماق قاعيدالارىن باسشىلىققا الىپ، ءسالت-داستۇرىمىزدى ساقتاي بىلسەك، قۋاتتى، ادىلەتتى، تازا، وركەندەگەن قازاقستاندى قۇرا الامىز. تاتۋلىق پەن ءوزارا سەنىمدى نىعايتا وتىرىپ، قاسيەتتى وتانىمىز – قازاقستان رەسپۋبليكاسىن كوركەيتۋ جولىندا بيىك ماقساتتارىمىزعا بىرگە جەتەمىز دەپ سەنەمىن. بارشاڭىزعا اماندىق، تابىس تىلەيمىن! - دەپ قورىتىندىلادى مەملەكەت باسشىسى.
