پرەزيدەنت جول جابىندىسىن بۇزاتىن بىرنەشە توننالىق جۇك كولىكتەرىنە ايىپپۇل سالۋ كەرەك ەكەنىن ايتتى

ساعىنىش سارداروۆا 31 مام. 2024 17:26 2825

قاسىم-جومارت توقايەۆ جول ساپاسىنا قاتىستى سالانى جەمقورلىق جايلاعانىن اشىق ايتتى، - دەپ حابارلايدى Dalanews.kz.

"ۇلتتىق قۇرىلتايدىڭ اتىراۋداعى وتىرىسىندا جول سالۋ جانە جوندەۋ بويىنشا اۋقىمدى جۇمىستاردى باستاۋدى تاپسىردىم. ول كەمىندە 12 مىڭ شاقىرىم اۆتوجولدى قامتيدى. اۆتوكولىك جولدارى – ەلدىڭ ەكونوميكالىق جانە الەۋمەتتىك تىنىس-تىرشىلىگىنىڭ كۇرە تامىرى. نەگىزگى قالالارىمىز بەن ايماقتارىمىزدىڭ اراسىن ساپالى جولدارمەن جالعاۋ ماڭىزدى. تاعى دا قايتالاپ ايتامىن – ساپالى جولدارمەن. اشىعىن ايتساق، جولداردىڭ ساپاسى سىن كوتەرمەيدى ءارى بۇل ماسەلە ءجيى كوتەرىلەدى.

جول ساپاسىنىڭ ناشارلىعىنا قاتىستى حالىقتىڭ نارازىلىعى ورىندى. ونىڭ سەبەبى كوپ. ەڭ باستىسى، سالانى جەمقورلىق جايلاعان. ۇكىمەت پەن سىبايلاس جەمقورلىققا قارسى ءىس-قيمىل اگەنتتىگىنە جول قۇرىلىسىنداعى سىبايلاس جەمقورلىقتى جويۋ جونىندە تاپسىرما بەرىلدى. مەملەكەت بولەتىن قارجىنىڭ بارلىعى تالان-تاراجعا تۇسپەي، تەك قانا قۇرىلىسقا جۇمسالۋى كەرەك. بۇل ءقازىر باسىم مىندەت. ماسەلەن، قىزىلوردا – جەزقازعان اۆتوكولىك جولىن قايتا جاڭعىرتۋ جۇمىسى ءبىرقاتار ايماقتىڭ، ونىڭ ىشىندە، جاڭادان قۇرىلعان ۇلىتاۋ وبلىسىنىڭ دامۋىنا تىڭ سەرپىن بەرۋى كەرەك ەدى. ءبىراق جوندەۋ جۇمىستارى وتە ناشار جۇرگىزىلگەن. حالىق ونداعان جىلدان بەرى جولدىڭ جاقسارعانىن كۇتىپ وتىر.

ءبىر جاعىنان، ەلىمىزدەگى اۆتوكولىك جولدارىنىڭ جاي-كۇيىنە وبەكتيۆتى مونيتورينگ جۇرگىزىلۋگە ءتيىس. ناقتى احۋالدى ايقىن كورسەتەتىن تىڭ تاسىلدەردى ويلاستىرعان ءجون. جول قۇرىلىسى جانە رەكونسترۋكسيا جۇمىستارى كەزىندە بارلىق قاجەتتى قۇزىرەتكە يە، نارىقتاعى بەدەلى ءمىنسىز، جاۋاپتى وتاندىق جانە شەتەلدىك كومپانيالاردىڭ الەۋەتىن بارىنشا پايدالانۋ كەرەك. بۇل ىسكە اشىقتان-اشىق دەمپينگپەن اينالىساتىن جالعان كومپانيالاردى تارتۋدىڭ قاجەتى جوق. ساپالى جول جالپىۇلتتىق مىندەتكە اينالۋى كەرەك. جولدىڭ ساپاسى جاقسارماي، ەلىمىزدىڭ دامۋى تۋرالى ءسوز قوزعاۋ مۇمكىن ەمەس"، - دەدى توقايەۆ.

مەملەكەت باسشىسى بۇل سالادا ماڭىزدى تاپسىرما دا بەردى.

"اۆتوماگيسترالداردى پايدالانۋ ىسىنە باقىلاۋدى كۇشەيتۋ قاجەت. جول جابىندىسىن بۇزاتىن بىرنەشە توننالىق جۇك كولىكتەرىنە ايىپپۇل سالۋ كەرەك. قارجى قۇيىپ قانا قويماي، عىلىمنىڭ دا جەتىستىكتەرى قولدانىلاتىن جوبا بولعاندىقتان جوعارى ساپالى كولىك ماگيسترالى كەز كەلگەن دامىعان ەلدىڭ جارقىن كەلبەتى سانالادى. سوندىقتان جول سالاسىنداعى قازاقستاندىق كومپانيالار عىلىمي ءتاسىلدى قولدانۋعا جانە يننوۆاسيالاردى ەنگىزۋگە جاڭا مۇمكىندىكتەردى تولىق پايدالانۋى قاجەت.

جالپى، بىلىمگە نەگىزدەلگەن ەكونوميكا قۇرۋ ءۇشىن عىلىمي مەكەمەلەر مەن بيزنەستىڭ ءوزارا تىعىز بايلانىسىن قامتاماسىز ەتۋ ماڭىزدى. بۇل جۇمىس بارىسىندا عىلىمي يدەيالاردى كوممەرسيالىق تابىستى ونىمگە اينالدىراتىن يننوۆاسيالىق كلاستەرلەر، تەحنوپاركتەر مەن بيزنەس-ينكۋباتورلار اشىلادى. مۇنداي قۇرىلىمدار ءتيىستى جوبالارعا يدەيادان باستاپ ونى نارىقتا جۇزەگە اسىرۋعا دەيىنگى بارلىق كەزەڭدە قولداۋ كورسەتۋى كەرەك"، - دەدى پرەزيدەنت.


ۇسىنىلعان
سوڭعى جاڭالىقتار