Qasym-Jomart Toqaev jol sapasyna qatysty salany jemqorlyq jailaǵanyn ashyq aitty, - dep habarlaidy Dalanews.kz.
"Ulttyq quryltaidyń Atyraýdaǵy otyrysynda jol salý jáne jóndeý boiynsha aýqymdy jumystardy bastaýdy tapsyrdym. Ol keminde 12 myń shaqyrym avtojoldy qamtidy. Avtokólik joldary – eldiń ekonomikalyq jáne áleýmettik tynys-tirshiliginiń kúre tamyry. Negizgi qalalarymyz ben aimaqtarymyzdyń arasyn sapaly joldarmen jalǵaý mańyzdy. Taǵy da qaitalap aitamyn – sapaly joldarmen. Ashyǵyn aitsaq, joldardyń sapasy syn kótermeidi ári bul másele jii kóteriledi.
Jol sapasynyń nasharlyǵyna qatysty halyqtyń narazylyǵy oryndy. Onyń sebebi kóp. Eń bastysy, salany jemqorlyq jailaǵan. Úkimet pen Sybailas jemqorlyqqa qarsy is-qimyl agenttigine jol qurylysyndaǵy sybailas jemqorlyqty joiý jóninde tapsyrma berildi. Memleket bóletin qarjynyń barlyǵy talan-tarajǵa túspei, tek qana qurylysqa jumsalýy kerek. Bul qazir basym mindet. Máselen, Qyzylorda – Jezqazǵan avtokólik jolyn qaita jańǵyrtý jumysy birqatar aimaqtyń, onyń ishinde, jańadan qurylǵan Ulytaý oblysynyń damýyna tyń serpin berýi kerek edi. Biraq jóndeý jumystary óte nashar júrgizilgen. Halyq ondaǵan jyldan beri joldyń jaqsarǵanyn kútip otyr.
Bir jaǵynan, elimizdegi avtokólik joldarynyń jai-kúiine obektivti monitoring júrgizilýge tiis. Naqty ahýaldy aiqyn kórsetetin tyń tásilderdi oilastyrǵan jón. Jol qurylysy jáne rekonstrýktsiia jumystary kezinde barlyq qajetti quzyretke ie, naryqtaǵy bedeli minsiz, jaýapty otandyq jáne sheteldik kompaniialardyń áleýetin barynsha paidalaný kerek. Bul iske ashyqtan-ashyq dempingpen ainalysatyn jalǵan kompaniialardy tartýdyń qajeti joq. Sapaly jol jalpyulttyq mindetke ainalýy kerek. Joldyń sapasy jaqsarmai, elimizdiń damýy týraly sóz qozǵaý múmkin emes", - dedi Toqaev.
Memleket basshysy bul salada mańyzdy tapsyrma da berdi.
"Avtomagistraldardy paidalaný isine baqylaýdy kúsheitý qajet. Jol jabyndysyn buzatyn birneshe tonnalyq júk kólikterine aiyppul salý kerek. Qarjy quiyp qana qoimai, ǵylymnyń da jetistikteri qoldanylatyn joba bolǵandyqtan joǵary sapaly kólik magistrali kez kelgen damyǵan eldiń jarqyn kelbeti sanalady. Sondyqtan jol salasyndaǵy qazaqstandyq kompaniialar ǵylymi tásildi qoldanýǵa jáne innovatsiialardy engizýge jańa múmkindikterdi tolyq paidalanýy qajet.
Jalpy, bilimge negizdelgen ekonomika qurý úshin ǵylymi mekemeler men biznestiń ózara tyǵyz bailanysyn qamtamasyz etý mańyzdy. Bul jumys barysynda ǵylymi ideialardy kommertsiialyq tabysty ónimge ainaldyratyn innovatsiialyq klasterler, tehnoparkter men biznes-inkýbatorlar ashylady. Mundai qurylymdar tiisti jobalarǵa ideiadan bastap ony naryqta júzege asyrýǵa deiingi barlyq kezeńde qoldaý kórsetýi kerek", - dedi Prezident.
