اسحات ورالوۆ پارتيا ءتوراعاسىنا الماتى، شىمكەنت قالالارىنداعى، تۇركىستان جانە شىعىس قازاقستان وبلىستارىنداعى جۇرتشىلىقپەن كەزدەسۋلەردىڭ ناتيجەلەرى، سونداي-اق قوعامدىق قابىلداۋلاردىڭ جۇمىستارى جونىندە باياندادى.
ناۋرىز ايىنان بەرى رەسپۋبليكالىق ءموبيلدى قوعامدىق قابىلداۋ 6 وڭىردە، اتاپ ايتقاندا اقمولا، قاراعاندى، پاۆلودار، قىزىلوردا، سولتۇستىك قازاقستان جانە تۇركىستان وبلىستارىندا تۇرعىندارمەن كەزدەسۋلەر وتكىزدى. ماۋسىم ايىنىڭ سوڭىنا دەيىن ەلىمىزدىڭ بارلىق وڭىرىندە قابىلداۋلاردى جالعاستىرۋ جوسپارلانىپ وتىر.
بۇدان بولەك «AMANAT» پارتياسىنىڭ اتقارۋشى حاتشىسى نەگىزگى باعدارلامالىق قۇجاتتاردى، پارتيا جانىنداعى قوعامدىق كەڭەستەردىڭ قىزمەتىن، جەرگىلىكتى جەرلەردە سايلاۋالدى باعدارلامانىڭ ورىندالۋىن تەكسەرۋدى، باستاۋىش پارتيا ۇيىمدارىنىڭ جۇمىسىن جانداندىرۋ، سونداي-اق «اشىق پارتيا» تۇجىرىمداماسى اياسىندا «TALQYLAU» ديالوگ الاڭىنىڭ ىسكە قوسىلعانى جونىندە باياندادى.
پرەزيدەنت تۇرعىندارمەن كەرى بايلانىس جاساۋ ءىسىن كۇشەيتۋ، ايماقتاردا دەپۋتاتتىق فراكسيالاردىڭ تيىمدىلىگىن ارتتىرۋ جانە پارتيانىڭ جاستار قاناتىن جاڭعىرتۋ قاجەتتىگىنە باسا ءمان بەردى.
مەملەكەت باسشىسى ازاماتتاردى تولعاندىرعان ماسەلەلەردى شەشۋ ءۇشىن «AMANAT» پارتياسىندا بارلىق قاجەتتى رەسۋرس بار ەكەنىن اتاپ ءوتتى. پرەزيدەنتتىڭ پىكىرىنشە، پارتيانىڭ ايماقتىق فيليالدارى وسى ماسەلەدە نەگىزگى ءرول اتقارۋعا ءتيىس جانە ءوز دەڭگەيىندە مازمۇندى قوعامدىق ديالوگتى نىعايتۋى قاجەت.
