پوليسەيلەر ەۋروپادان قازاقستانعا كەلەتىن ءقاۋىپتى كەسەلدىڭ جولىن كەستى

قاراكوز امانتاي 13 اقپ. 2024 09:40 1315

الماتىدا ەسىرتكى قىلمىسىنا قارسى ءىس-قيمىل ءبولىمىنىڭ قىزمەتكەرلەرى يتاليا مەن پولشادان قازاقستانعا جەتكىزىلەتىن كوكاين ارناسىنىنىڭ جولىن كەستى، دەپ حابارلايدى Dalanews.kz.

وڭتۇستىك استانادا جالعا الىنعان پاتەردە سالماعى 250 گرامم كوكاين تاركىلەندى. ول كوفە تۇرىندە پلاستيكالىق كاپسۋلالارعا جاسىرىلعان.

بۇدان ءارى "قازپوشتا" بولىمشەسىندە فيگۋرانتقا تيەسىلى سالەمدەمەنى تاركىلەۋ بويىنشا تەرگەۋ شارالارى جۇرگىزىلدى. ودان جالپى سالماعى شامامەن 1 كەلى ەسىرتكى زاتتارى بار پلاستيكالىق بانكالار تابىلدى، ونىڭ ىشىندە 0،5 كەلى كوكاين جانە 400 گرامنان استام ەكستازي بولعان. بۇل ءۇش مىڭنان استام ءبىر رەتتىك دوزانى قۇرايدى.

انىقتالعانداي، ۇستالعان شەتەلدىك ازامات كۋرەر فۋنكسياسىن ءۇش ايعا جۋىق ورىنداپ كەلگەن، ال الماتىعا شارۋاشىلىق تاۋار رەتىندە جاسىرىلعان پوشتا سالەمدەمەلەرى ارقىلى ەسىرتكىنىڭ سيرەك تۇرلەرىن ساتۋ ماقساتىندا عانا كەلگەن.

"ۇستالعان ادامعا قاتىستى ەسىرتكى زاتتارىن وتكىزۋ ماقساتىندا اسا ءىرى مولشەردە زاڭسىز ساتىپ الۋ جانە ساقتاۋ فاكتىسى بويىنشا سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر. كۇدىكتى قاماۋعا الىندى. وزگە اقپارات تەرگەۋ مۇددەسى ءۇشىن جاريا ەتىلمەيدى، – دەدى ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ ورىنباسارى باقىتجان ءامىرحانوۆ.

ەسكە سالا كەتەيىك، بۇل قىلمىستار ءۇشىن مۇلكى تاركىلەنىپ، ون جىلدان ون بەس جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلادى.


ۇسىنىلعان
سوڭعى جاڭالىقتار
x