الەم جانە وليمپيادا چەمپيوندارىنىڭ باسىن قوسقان دودا الدىنداعى باسپا ءسوز جيىنىنا رەسەي سپورتتىق كۇرەس فەدەراسياسىنىڭ پرەزيدەنتى ميحايل مامياشۆيلي، PWL ءتۋرنيرىنىڭ اتقارۋشى ديرەكتورى يۋريي فەدوروۆ، Olimpbet بۋكمەكەرلىك كەڭسەسىنىڭ تمد ەلدەرىندەگى ماركەتينگ بويىنشا ديرەكتورى ەلەنا مەلەشينا، قازاقستان كۇرەس فەدەراسياسىنىڭ ۆيسە-پرەزيدەنتى مارات مۇزاپاروۆ جانە گرەك-ريم كۇرەسىنەن ەكى دۇركىن وليمپيادا، ءۇش دۇركىن الەم چەمپيونى رومان ۆلاسوۆ پەن توكيو وليمپياداسىنىڭ كۇمىس جۇلدەگەرى، قازىرگى الەم چەمپيونى اقجول ماحمۇدوۆتار قاتىستى.
باسپا ءسوز ءماسليحاتىندا ءسوز العان ەلەنا مەلەشينا Olimpbet بۋكمەكەرلىك كەڭسەسى ەلىمىزدەگى كۇرەس تۇرلەرىن دامىتۋ ءۇشىن قولداۋ كورسەتىپ جاتقانىن مالىمدەدى.
«شىنى كەرەك، مۇنداي اۋقىمدى جارىس الدىندا ازداپ قوبالجىپ تۇرمىز. مەن ءۇشىن كۇرەس ول ناعىز ەر ازاماتتار اينالىساتىن سپورت. بۇل تۋرنير كۇرەستىڭ جانكۇيەرلەرىن ودان ءارى ارتتىرا تۇسەدى دەپ ۇمىتتەنەمىز. ارينە، كۇرەس ءقازىردىڭ وزىندە وتە بەدەلدى سپورت ءتۇرى سانالادى. دەسە دە، بۇل دودا كۇرەستىڭ تانىمالدىعىن تاعى دا كوتەرەدى دەگەن ويدامىز. ءبىزدى كەرەمەت تارتىستى كەزدەسۋلەر كۇتىپ تۇر دەگەن سەنىمدەمىن. ودان بولەك، كۇرەستى قازاقستاندا قاتتى جاقسى كورەدى جانە ءداستۇرلى سپورت ءتۇرى سانايدى. قازاقستان گرەك-ريم، ەركىن جانە ايەلدەر كۇرەسى فەدەراسياسىمەن بىرگە پوددۋبنىي ليگاسىمەن دە ارىپتەستىك قارىم-قاتىناس ورناتۋ – بۇل دەمەۋشى بولۋدان دا ارتىق نارسە. قازاقستاندىق بالۋاندار دا ب ا ق سىنايتىن كۇرەس ليگاسىنا كومەكتەسە الاتىنىمىز ءۇشىن قۋانىشتىمىن! مۇنداي تاريحي وقيعانىڭ ءبىر بولشەگى بولۋ وتە ماڭىزدى نارسە»، - دەدى ەلەنا مەلەشينا.
پوددۋبنىي ليگاسىنىڭ اتقارۋشى ديرەكتورى يۋريي فەدوروۆ ءتۋرنيردى الماتىدا ۇيىمداستىرۋعا نە سەبەپ بولعانىن دا ايتتى.
«بۇعان دەيىن ءبىزدىڭ ليگانىڭ ءۇش ءتۋرنيرى ءوتتى. ونىڭ ەكەۋى - ماسكەۋدە، ءبىرى – قىرعىزستان استاناسى بىشكەكتە ۇيىمداستىرىلعان. وسى جولى الماتىنى تاڭداۋىمىزعا بىرنەشە سەبەپ بولدى. ەڭ نەگىزگى سەبەپ – ءبىزدىڭ باس دەمەۋشىمىز Olimpbet بۋكمەكەرلىك كەڭسەسىنىڭ ۇسىنىسى ەدى. بۇل كومپانيا بۋكمەكەر نارىعىنداعى ۇزدىكتەردىڭ ءبىرى سانالاتىنىن بىلەسىزدەر. ودان بولەك، ءبىز تۋرنيرگە ارنالعان ستريمينگتىك كانال قۇرعانبىز. سول كانال ارقىلى قازاقستانداعى جانكۇيەرلەرىمىزدىڭ كوپ ەكەنىن بايقاپ، الماتىدا بالۋانداردىڭ تارتىستى باسەكەسىن وتكىزۋ تۋرالى شەشىم قابىلدادىق»، - دەيدى فەدوروۆ.
ال اتى اڭىزعا اينالعان بالۋان، رەسەي كۇرەس فەدەراسياسىنىڭ پرەزيدەنتى ميحايل مامياشۆيلي بۇل باسەكە سپورتشىلارعا ۇلكەن جول اشاتىنىن ايتتى.
«بالۋاندار ءوز شەبەرلىگىن ارتتىرىپ قانا قويماي، اقشا تابۋى دا كەرەك. بۇعان پوددۋبنىي ليگاسى كومەكتەسەدى. ال مەن ءبىزدى كەرەمەت كەزدەسۋلەر كۇتىپ تۇرعانىنا كامىل سەنەمىن»، - دەدى مامياشۆيلي.
بالۋان شولاق اتىنداعى سپورت كەشەنىندە وتەتىن پوددۋبنىي ليگاسى بيىل 15 ەلدەن كەلگەن سپورتشىلاردىڭ باسىن قوسپاق. بالۋاندار باسەكەسىندە گرەك-ريم، ەركىن جانە ايەلدەر كۇرەسىنەن تارتىستى كەزدەسۋلەر وتەدى. ەركىن كۇرەستە وليمپيادا چەمپيونى زاۋر ۋگييەۆ (رەسەي) پەن قازىرگى الەم چەمپيونى زەليمحان اباكانوۆ (البانيا) اراسىنداعى كەزدەسۋ كوپشىلىك نازارىن اۋداراتىنى انىق.
ال گرەك-ريم كۇرەسىنىڭ جۇلدىزدارى – ەكى دۇركىن وليمپيادا، ءۇش دۇركىن الەم چەمپيونى، رەسەيلىك رومان ۆلاسوۆ پەن الەم جانە ازيا چەمپيونى، وليمپيادانىڭ كۇمىس جۇلدەگەرى، قىرعىزستاندىق اقجول ماحمۇدوۆ اراسىنداعى بەلدەسۋدى كورگەن دە، كورمەگەن دە ارماندا. قوس مىقتىنىڭ ءوزارا تارتىسىن بالۋان شولاققا جينالعان كورەرمەندەر اقىلى ستريمينگ كانالدىڭ جازىلۋشىلارى تاماشالاي الادى.ۆلاسوۆ پەن ماحمۋدوۆ اراسىنداعى كەزدەسۋ PWL-4 دوداسىنىڭ باستى جەكپە-جەگى بولماق.
"مەن بۇل بەلدەسۋدى اسىعا كۇتتىم. سەبەبى بىزدەگى جاعداي ورىن العان سوڭ، اقجول وليمپيادانىڭ كۇمىسىن يەلەنىپ، الەم چەمپيونى اتاندى. رەسەيلىك بالۋاندار حالىقارالىق جارىستارعا قاتىسا الماعان سوڭ، اقجول ەكەۋمىزدىڭ جولىمىز تۇيىسپەي كەتتى. ەرتەڭگى كەزدەسۋگە ءتاس-تۇيىن دايىنمىن"، - دەدى ۆلاسوۆ.
اقجول بولسا، الداعى جارىستار كەستەسى بەلگىسىز بولعانىنا قاراماستان، توقتاۋسىز جاتتىعىپ جۇرگەن رەسەيلىك بالۋاندارعا العىسىن ايتتى.
"مەن قولىمنان كەلگەننىڭ ءبارىن ىستەدىم. ەندى تەك ەرتەڭ كىلەمگە شىعىپ، بەلدەسۋ عانا قالدى. قولداۋشىلارعا راحمەت. وسى ورايدا، جارىستارعا قاتىسۋ مۇمكىندىگى بەلگىسىز بولسا دا، ايانباي تەر توگىپ جۇرگەن رەسەيلىك بالۋانداردى ەرەكشە اتاپ وتكىم كەلەدى"، - دەدى ماحمۋدوۆ.
سونداي-اق بۇل باسەكەگە قازاقستاندىق ءۇش بالۋان قاتىسقالى وتىر. ولار – ەركىن كۇرەستەن ازيا چەمپيونى بولات ساقايەۆ، ەركىن كۇرەستەن ەكى دۇركىن ازيا چەمپيونى، الەم بىرىنشىلىگىنىڭ قولا جۇلدەگەرى ازامات داۋلەتبەكوۆ جانە ايەلدەر كۇرەسىنەن الەم چەمپيوناتىنىڭ كۇمىس جۇلدەگەرى ءجاميلا باقبەرگەنوۆا.
ازامات داۋلەتبەكوۆتىڭ قارسىلاسى – رەسەيلىك ارسلان باگايەۆ. بولات ساقايەۆ PWL-2 ءتۋرنيرىنىڭ جەڭىمپازى، رەسەيلىك احمەد ۋسمانوۆپەن بەلدەسەدى. ءجاميلا باقبەرگەنوۆا PWL-2 ءتۋرنيرىنىڭ ەكى دۇركىن چەمپيونى، رەسەيلىك كسەنيا بۋراكوۆاعا قارسى شىعادى.
ودان بولەك، الماتىداعى بالۋاندار باسەكەسىندە وليمپيادا چەمپيونى لۋيس البەرتو ورتا سانچەز (كۋبا)، وليمپيادا جۇلدەگەردەرى سەرگەي سەمەنوۆ (رەسەي)، گادجي الييەۆ (ءازىربايجان)، بات-وچير بولورتۋيا (موڭعوليا)، الەم چەمپيوندارى اناستاسيا نيكيتا (مولدوۆا)، جوولامان شارشەنبەكوۆ (قىرعىزستان)، مالحاس امويان (ارمەنيا)، اباسگادجي ماگومەدوۆ (رەسەي)، الەم چەمپيوناتىنىڭ جۇلدەگەرلەرى ماگومەد كۋربانوۆ (رەسەي)، باتىربەك ساكۋلوۆ (سلوۆاكيا)، سانان سۇلەيمانوۆ (ءازىربايجان)، ايك مناساكانيان (بولگاريا)، وسكار پينو حيندس (كۋبا) بوزكىلەمگە شىعادى.
جالپى العاندا PWL-4 دوداسىندا 13 ەلدىڭ بالۋاندارى ب ا ق سىناماق. پوددۋبنىي كۇرەس ليگاسى – الەمنىڭ ۇزدىك بالۋاندارىنىڭ قاتىسۋىمەن وتەتىن كاسىبي بالۋاندار ليگاسى. مۇنداعى جۇلدە قورى دا قوماقتى. 2022 جىلى تۋرنير ءۇش رەت ۇيىمداستىرىلدى. ونىڭ ەكەۋى ماسكەۋدە، بىرەۋى بىشكەكتە وتكەن. وسى ۋاقىتقا دەيىن پوددۋبنىي ليگاسىندا الەمنىڭ 15 مەملەكەتىنەن مىڭعا جۋىق بالۋاندار قاتىستى. ولاردىڭ قاتارىندا بەس وليمپيادا چەمپيونى، ءتورت الەم چەمپيونى مەن وننان اسا وليمپيادا، الەم، ازيا جانە ەۋروپا چەمپيوناتتارىنىڭ جۇلدەگەرلەرى بار. تۋرنير بيىل دا اۋقىمىن كەڭەيتكەلى وتىر.
