سولتۇستىك قازاقستان وبلىسىنداعى سەرگەيەۆ سۋ قويماسىنىڭ تولىمدىلىعى 180%-عا جەتتى. بۇل تۋرالى وبلىستىڭ توتەنشە جاعدايلار دەپارتامەنتى باستىعىنىڭ ورىنباسارى مۇرات قانعوجينوۆ ايتتى، دەپ حابارلايدى Dalanews.kz.

ونىڭ مالىمەتىنشە، ەسىل وزەنىنىڭ جايىلماسىندا كەپتەلىس بايقالماعانىمەن، قويماداعى سۋ دەڭگەيى 415 سم-گە جەتكەن.

"12 - ساۋىردەن باستاپ وبلىس ورتالىعىنا دەيىن (پەتروپاۆل) ۇلكەن سۋدىڭ كەلۋى كۇتىلەدى، شىڭى 23- ساۋىرگە كەلەدى. سونىمەن قاتار سۋ تاسقىنى جاعدايى تۇراقتى مونيتورينگ رەجيمىندە"، - دەدى مۇرات قانعوجينوۆ.

بۇگىندە ەسىل وزەنىنىڭ جاعاسىندا ورنالاسقان 3 اۋدان مەن پەتروپاۆل قالاسىندا سۋ تاسقىنى بولۋ ءقاۋپى بار. بۇل ايماققا 845 تۇرعىن ءۇي جانە 5 مىڭ ساياجاي كىرەدى.

سونىمەن قاتار، وسى ۋاقىتقا دەيىن 40 ءۇيدىڭ 13ء-ى سۋ استىندا قالدى. 244 ادام ەۆاكۋاسيالاندى، 44 ادام ۇيگە قايتارىلدى. بۇدان بولەك، سۋ باسقان 111 ءۇي ماڭىنداعى اۋماق بار.

كۇشتەر مەن قۇرالداردىڭ قوسىمشا توپتارى قۇرىلدى.