سقو اكىمىنىڭ ورىنباسارى ءساتجان ابلالييەۆ بۇل باعىتتاعى جۇمىسقا قىزىققان قۇرىلىس كومپانيالارى رەنوۆاسيالىق جۇمىستاردى الگوريتمى جايىندا قىسقاشا بايانداپ بەردى.
– ءبىرىنشى كەزەكتە بىزدەر اپاتتى جاعداي تۇرعان ۇيلەردى انىقتاپ ولارعا ينۆەنتاريزاسيالاۋ جۇمىستارىن جۇرگىزدىك. بۇدان كەيىن جەرگىلىكتى بيلىك ورىندارى قاتىسۋىمەن جۇمىستى اتقاراتىن ينۆەستورلاردى ىزدەستىردىك. بۇل رەتتە بىزدەر قۇرىلىس كومپانيالارىنىڭ ەكى جىلعى جۇمىس تاجىريبەسى مەن بانكتىك كەپىلدىگىنە باسا ءمان بەرگەنىمىزدى ايتا كەتۋىمىز كەرەك. بۇدان كەيىن ينۆەستورمەن كەلسىم-شارتقا قول قويىپ، ولارعا جەر تەلىمى مەن جوبالىق قۇجاتتى تاپسىردىق. ولار قۇرىلىس جۇمىستارىن اياقتاعاننان كەيىن كەلسىم-شارتتا كورسەتىلگەندەي جەرگىلىكتى بيلىك ورىندارىنا ءوز ۇلەسىن پاتەر نەگىزىندە بەرىپ وتىردى، – دەيدى ءساتجان ابلالييەۆ.
وسىلايشا جەرگىلىكتى بيلىك ورىندارى مەن جەكەلەگەن قۇرىلىس كومپانيالارىنىڭ اراسىنداعى ءوزارا ىنتىماقتاستىقتىڭ ارقاسىندا وڭىردە اپاتتى جاعدايدا تۇرعان ۇيلەردىڭ سانى ايتارلىقتاي قىسقارعان.
قازىرگى تاڭدا پەتروپاۆل قالاسىندا رەنوۆاسيا باعدارلاماسى بويىنشا 27 كوپقاباتتى تۇرعىن ءۇي سالۋ جوسپارلانۋدا.
647 پاتەرى بار 9 ءۇيدى مەملەكەتتىك بيۋدجەت ەسەبىنەن بوي كوتەرسە، قالعانىن ينۆەستورلاردىڭ قارجىسىنا سالۋ كوزدەلگەن. جاڭادان سالىنعان ۇيلەردىڭ اينالاسىن اباتتاندىرۋ جۇمىستارىن جەرىگىلىكتى اكىمدىك ءوز مويىنىنا الىپ وتىر. وسىلايشا رەنوۆاسيالىق جۇمىستاردىڭ ارقاسىندا پەتروپاۆل قالاسىنىڭ اجارى كىرىپ قالدى.
