پەتروپاۆل قالالىق سوتى قالالىق اكىمدىككە قاراستى ەڭ ءىرى كوممۋنالدىق كاسىپورىنداردىڭ ءبىرىن باسقارعان پاۆەل بۋلايەۆقا ۇكىم شىعاردى. ول بيۋدجەت قارجىسىن ءىرى كولەمدە جىمقىرعانى ءۇشىن 8 جىلعا باس بوستاندىعىنان ايىرىلىپ، مۇلكى تاركىلەندى. ەكس-دەپۋتاتپەن بىرگە ءۇش ارىپتەسىنە دە ءتۇرلى جازا تاعايىندالدى، دەپ حابارلايدى Dalanews.kz.
بۋلايەۆ 2017 جىلدان باستاپ “تازارتقىش، سۋ تارتقىش جانە سۋ وتكىزگىش عيماراتتار” كمك-نى باسقارىپ، كەيىن 2023 جىلى وبلىستىق ءماسليحات دەپۋتاتى اتانعان. ءبىراق بىلتىر اقپان ايىندا سقو سىبايلاس جەمقورلىققا قارسى قىزمەتى ونى بيۋدجەت قاراجاتىن جىمقىردى دەگەن كۇدىكپەن ۇستادى. تەرگەۋ ناتيجەسىندە ونىڭ ورىنباسارى دەنيس مارشالوۆ، زاڭگەر رۋسلان ياكوۆەنكو جانە تاعى ءبىر قىزمەتكەر ليەۆ شاكشاكبايەۆ تا كۇدىككە ءىلىندى.
ولار ءوز اتتارىنا كومپانيا اشىپ، كاسىپورىنمەن كەلىسىمشارتقا وتىرىپ، كارىز جۇيەسىن قايتا جاڭارتۋ، سورعى ستانسيالارىن جوندەۋ، تەحنيكا جالداۋ قىزمەتىن كورسەتكەن. الايدا بۇل كومپانيالاردىڭ كەيبىرىندە نە تەحنيكا، نە قىزمەتكەر بولماعان. بارلىق جۇمىستاردى ءىس جۇزىندە اكىمدىككە قاراستى جۇمىسشىلار اتقارعان. ال بولىنگەن قاراجات كۇدىكتىلەردىڭ قالتاسىنا تۇسكەن.
بۋلايەۆ بۇل ىسكە بۇرىنعى ايەلى انجەليكا بۋلايەۆانى دا تارتقان. ونىڭ اتىنا كومپانيا اشىپ، قارجىنى سوعان اۋدارىپ وتىرعان. بۇدان بولەك، بۋلايەۆ بار مۇلكىن دە ەكس-جارىنىڭ اتىنا راسىمدەگەن. تەرگەۋ بارىسىندا ولاردىڭ ارا-قاتىناسى قاعاز جۇزىندە عانا ۇزىلگەنى انىقتالعان.
سوت وتىرىسىندا انجەليكا بۋلايەۆانىڭ اتىنا تىركەلگەن دۇنيە-مۇلىكتەر دە جاريا ەتىلدى:
– قالا ورتالىعىنداعى قۇنى 19 ملن تەڭگە بولاتىن دۇكەن،
– جالپى قۇنى 94 ملن تەڭگەدەن اساتىن التى پاتەر،
– 27 ملن تەڭگەنىڭ شەبەرحاناسى، بىرنەشە جەر تەلىمدەرى،
– Toyota Land Cruiser 200 (32 ملن تگ)،
– ەكاتەرينبۋرگتە تىركەلگەن BMW X6 (14 ملن تگ)،
– يۋريي چەكانيننىڭ اتىنا تىركەلگەن Porsche Macan،
– “تەحنوسيلا سك” جشس-گە تيەسىلى تەحنيكا – ەكى ەكسكاۆاتور، Foton، كاماز، ۋاز جانە گاز-53 كولىكتەرى.
سوت ۇكىمىنە ساي، پاۆەل بۋلايەۆپەن بىرگە ونىڭ ءۇش سىبايلاسى – مارشالوۆ، ياكوۆەنكو جانە شاكشاكبايەۆ 7 جىل 6 ايعا باس بوستاندىقتارىنان ايىرىلدى. بۇعان دەيىن ولار ءۇيقاماقتا وتىرعان. سوت زالىندا قاماۋعا الىندى.
سۋديا ازامات ءاشىموۆ:
"سوت ايىپتالۋشىلاردىڭ ەشقايسىسى كىناسىن مويىنداماعانىمەن، ولاردىڭ قىلمىسى تولىق دالەلدەندى. جازا تاعايىنداۋ كەزىندە كامەلەتكە تولماعان بالالارى بار ەكەنى ەسكەرىلدى. دەگەنمەن، اۋىرلاتاتىن ءمان-جايلار دا بولدى"، – دەدى.
بارلىق سوتتالعاندار ەندى ءومىر بويى مەملەكەتتىك قىزمەتتە، سوت جانە قارجى سالاسىندا جۇمىس ىستەي المايدى. سونىمەن قاتار، قالا اكىمدىگىنە كەلگەن شىعىن وتەلۋى ءتيىس – 805 ميلليون تەڭگەدەن استام قاراجات بيۋدجەتكە قايتارىلۋى مىندەتتەلدى.
