Petropavl qalalyq soty qalalyq ákimdikke qarasty eń iri kommýnaldyq kásiporyndardyń birin basqarǵan Pavel Býlaevqa úkim shyǵardy. Ol biýdjet qarjysyn iri kólemde jymqyrǵany úshin 8 jylǵa bas bostandyǵynan aiyrylyp, múlki tárkilendi. Eks-depýtatpen birge úsh áriptesine de túrli jaza taǵaiyndaldy, dep habarlaidy Dalanews.kz.
Býlaev 2017 jyldan bastap “Tazartqysh, sý tartqysh jáne sý ótkizgish ǵimarattar” KMK-ny basqaryp, keiin 2023 jyly oblystyq máslihat depýtaty atanǵan. Biraq byltyr aqpan aiynda SQO Sybailas jemqorlyqqa qarsy qyzmeti ony biýdjet qarajatyn jymqyrdy degen kúdikpen ustady. Tergeý nátijesinde onyń orynbasary Denis Marshalov, zańger Rýslan Iakovenko jáne taǵy bir qyzmetker Lev Shakshakbaev ta kúdikke ilindi.
Olar óz attaryna kompaniia ashyp, kásiporynmen kelisimshartqa otyryp, káriz júiesin qaita jańartý, sorǵy stantsiialaryn jóndeý, tehnika jaldaý qyzmetin kórsetken. Alaida bul kompaniialardyń keibirinde ne tehnika, ne qyzmetker bolmaǵan. Barlyq jumystardy is júzinde ákimdikke qarasty jumysshylar atqarǵan. Al bólingen qarajat kúdiktilerdiń qaltasyna túsken.
Býlaev bul iske burynǵy áieli Anjelika Býlaevany da tartqan. Onyń atyna kompaniia ashyp, qarjyny soǵan aýdaryp otyrǵan. Budan bólek, Býlaev bar múlkin de eks-jarynyń atyna rásimdegen. Tergeý barysynda olardyń ara-qatynasy qaǵaz júzinde ǵana úzilgeni anyqtalǵan.
Sot otyrysynda Anjelika Býlaevanyń atyna tirkelgen dúnie-múlikter de jariia etildi:
– Qala ortalyǵyndaǵy quny 19 mln teńge bolatyn dúken,
– Jalpy quny 94 mln teńgeden asatyn alty páter,
– 27 mln teńgeniń sheberhanasy, birneshe jer telimderi,
– Toyota Land Cruiser 200 (32 mln tg),
– Ekaterinbýrgte tirkelgen BMW X6 (14 mln tg),
– Iýrii Chekaninniń atyna tirkelgen Porsche Macan,
– “Tehnosila SK” JShS-ge tiesili tehnika – eki ekskavator, Foton, KamAZ, ÝAZ jáne GAZ-53 kólikteri.
Sot úkimine sai, Pavel Býlaevpen birge onyń úsh sybailasy – Marshalov, Iakovenko jáne Shakshakbaev 7 jyl 6 aiǵa bas bostandyqtarynan aiyryldy. Buǵan deiin olar úiqamaqta otyrǵan. Sot zalynda qamaýǵa alyndy.
Sýdia Azamat Áshimov:
"Sot aiyptalýshylardyń eshqaisysy kinásin moiyndamaǵanymen, olardyń qylmysy tolyq dáleldendi. Jaza taǵaiyndaý kezinde kámeletke tolmaǵan balalary bar ekeni eskerildi. Degenmen, aýyrlatatyn mán-jailar da boldy", – dedi.
Barlyq sottalǵandar endi ómir boiy memlekettik qyzmette, sot jáne qarjy salasynda jumys istei almaidy. Sonymen qatar, qala ákimdigine kelgen shyǵyn ótelýi tiis – 805 million teńgeden astam qarajat biýdjetke qaitarylýy mindetteldi.
