پەريزات قايراتقا قاتىستى ءىستى تەرگەۋ اياقتالدى. بۇل تۋرالى قارجىلىق مونيتورينگ اگەنتتىگى ءتوراعاسىنىڭ ورىنباسارى جەڭىس ەلەمەسوۆ مالىمدەدى، – دەپ حابارلايدى Dalanews.kz.
اگەنتتىك وكىلىنىڭ سوزىنشە، كۇدىكتىگە قاتىستى قىلمىستىق ءىس اياقتالعان، ال ءقازىر پروسەسكە قاتىسۋشىلار قىلمىستىق ءىس ماتەريالدارىمەن تانىسىپ جاتىر.
"3،5 ميلليارد تەڭگە شىعىن سوماسىنا توقتالدىق. بۇعان دەيىن قىلمىستىق جولمەن الىنعان اقشانى زاڭداستىرۋ دەرەكتەرى تۋرالى ايتتىم. قىلمىستىق جولمەن الىنعان اقشانى زاڭداستىرۋعا قاتىستى ايتار بولساق، پەريزات قايرات گۇل دۇكەنىن ساتىپ الۋعا اقشا سالعان. وسىلايشا ول قوعامعا ءوزىن تابىستى بيزنەس لەدي رەتىندە كورسەتكەن"، - دەدى ەلەمەسوۆ سەناتتا وتكەن بريفينگتە.
پەريزات قايراتتان الىنعان مۇلىكتىڭ تاعدىرىن سوت شەشپەك.
"نە ول جابىرلەنۋشىلەرگە كەلتىرىلگەن زالالدى وتەۋگە جۇمسالادى، نە ول مەملەكەت كىرىسىنە تۇسەدى"، - دەدى قما وكىلى.
اگەنتتىك ءتوراعاسىنىڭ ورىنباسارىنىڭ سوزىنشە، كۇدىكتى پەريزات قايرات بۇل ەپيزودتار بويىنشا كىناسىن مويىنداماعان.
ەسكە سالايىق، پەريزات قايرات كوكتەمگى سۋ تاسقىنىنان زارداپ شەككەن ازاماتتارعا كومەكتەسۋ ءۇشىن جينالعان 1،5 ملرد تەڭگەدەن اسا قاراجاتتى جىمقىردى دەگەن كۇدىككە ىلىنگەن بولاتىن. مالىمەتكە سۇيەنسەك، قايىرىمدىلىقتىڭ نەگىزگى بولىگى قىمبات ءسان بۇيىمدارى مەن جىلجىمايتىن مۇلىكتى ساتىپ الۋ ماقساتىنا جۇمسالعان.
«بيىل كوكتەمدە ول ەلورداداعى اۆتوسالونداردا 88 ملن تەڭگەگە «Mercedes-Benz S450»، 80 ملن تەڭگەگە «Lexus LX-600» جانە 39 ملن تەڭگەگە «Haval» اۆتوكولىكتەرىن ساتىپ الدى. وسى كەزەڭدە ول جالپى سوماسى 600 ملن تەڭگەنى قۇرايتىن ەلوردانىڭ پرەميۋم ساناتتاعى «Akbulak Riviera»، «Highvill Ishim Gold»، «كوك جايلاۋ» تك (تۇراق ورىندارىن قوسا العاندا)، سونداي-اق «Vela Village» كوتتەدج قالاشىعىندا جىلجىمايتىن مۇلىك نىساندارىن ساتىپ الدى.
سونىمەن قاتار، قازاقستاندىقتاردىڭ قايىرىمدىلىققا جىبەرگەن قاراجات ەسەبىنەن پەريزات ق. دۋباي، دوحا، لوندون جانە ستامبۋلداعى «St. Regis»، «Shangri-La»، «Palazzo Versace» جانە «Kempinski» سياقتى بەس جۇلدىزدى قوناق ۇيلەردە دەمالعان. بۇل ەلدەردە ول «Cartier» جانە «Louis Vuitton» سياقتى برەندتەردىڭ قىمبات اكسەسسۋارلارى مەن زەرگەرلىك بۇيىمداردى ساتىپ الىپ، فەشەنەبەلدى مەيرامحانالارعا بارىپ، ياحتالاردى جالداعان. قىلمىستىق سحەمانى جۇزەگە اسىرۋ ءۇشىن دوستارى مەن تۋىستارىنا 8% سىياقى بەرىپ، قوردىڭ اقشاسى قولما-قول اقشاعا اينالدىرىپ وتىرعان"، - دەپ جازىلعان بۇعان دەيىنگى قما مالىمەتىندە.
ارتىنشا قما ونىڭ زاڭسىز ارەكەتىنىڭ تاعى ءبىر ەپيزودى انىقتالعانىن حابارلادى.
"2023 جىلدىڭ قاراشا ايىندا پەريزات قايرات پالەستينا تۇرعىندارىنا گۋمانيتارلىق كومەك كورسەتۋ ءۇشىن قاراجات جيناۋدى ۇيىمداستىردى. 2023 جىلعى جەلتوقساندا وسى اقشا ەسەبىنەن پەريزات ق. «Sensata Plaza» ەليتالىق كەشەنىنەن 49 ملن تەڭگەگە ءۇش بولمەلى پاتەر جانە 30 ملن تەڭگەگە «Mercedes-Benz EQE 500 4 Matic» جاڭا اۆتوكولىگىن ساتىپ الدى. سونىمەن قاتار، قاراجاتتىڭ ءبىر بولىگى باا-دە «Rolex»، «Prada» جانە «Fendi» برەندتىك بۋتيكتەرىنەن زەرگەرلىك بۇيىمداردى، ساعاتتار مەن كيىمدەردى ساتىپ الۋعا جۇمسالدى"، - دەپ جازىلعان حابارلامادا.
