Perizat Qairatqa qatysty isti tergeý aiaqtaldy. Bul týraly Qarjylyq monitoring agenttigi tóraǵasynyń orynbasary Jeńis Elemesov málimdedi, – dep habarlaidy Dalanews.kz.
Agenttik ókiliniń sózinshe, kúdiktige qatysty qylmystyq is aiaqtalǵan, al qazir protseske qatysýshylar qylmystyq is materialdarymen tanysyp jatyr.
"3,5 milliard teńge shyǵyn somasyna toqtaldyq. Buǵan deiin qylmystyq jolmen alynǵan aqshany zańdastyrý derekteri týraly aittym. Qylmystyq jolmen alynǵan aqshany zańdastyrýǵa qatysty aitar bolsaq, Perizat Qairat gúl dúkenin satyp alýǵa aqsha salǵan. Osylaisha ol qoǵamǵa ózin tabysty biznes ledi retinde kórsetken", - dedi Elemesov Senatta ótken brifingte.
Perizat Qairattan alynǵan múliktiń taǵdyryn sot sheshpek.
"Ne ol jábirlenýshilerge keltirilgen zalaldy óteýge jumsalady, ne ol memleket kirisine túsedi", - dedi QMA ókili.
Agenttik tóraǵasynyń orynbasarynyń sózinshe, kúdikti Perizat Qairat bul epizodtar boiynsha kinásin moiyndamaǵan.
Eske salaiyq, Perizat Qairat kóktemgi sý tasqynynan zardap shekken azamattarǵa kómektesý úshin jinalǵan 1,5 mlrd teńgeden asa qarajatty jymqyrdy degen kúdikke ilingen bolatyn. Málimetke súiensek, qaiyrymdylyqtyń negizgi bóligi qymbat sán buiymdary men jyljymaityn múlikti satyp alý maqsatyna jumsalǵan.
«Biyl kóktemde ol elordadaǵy avtosalondarda 88 mln teńgege «Mercedes-Benz S450», 80 mln teńgege «Lexus LX-600» jáne 39 mln teńgege «Haval» avtokólikterin satyp aldy. Osy kezeńde ol jalpy somasy 600 mln teńgeni quraityn elordanyń premiým sanattaǵy «Akbulak Riviera», «Highvill Ishim Gold», «Kók Jailaý» TK (turaq oryndaryn qosa alǵanda), sondai-aq «Vela Village» kottedj qalashyǵynda jyljymaityn múlik nysandaryn satyp aldy.
Sonymen qatar, qazaqstandyqtardyń qaiyrymdylyqqa jibergen qarajat esebinen Perizat Q. Dýbai, Doha, London jáne Stambýldaǵy «St. Regis», «Shangri-La», «Palazzo Versace» jáne «Kempinski» siiaqty bes juldyzdy qonaq úilerde demalǵan. Bul elderde ol «Cartier» jáne «Louis Vuitton» siiaqty brendterdiń qymbat aksessýarlary men zergerlik buiymdardy satyp alyp, feshenebeldi meiramhanalarǵa baryp, iahtalardy jaldaǵan. Qylmystyq shemany júzege asyrý úshin dostary men týystaryna 8% syiaqy berip, qordyń aqshasy qolma-qol aqshaǵa ainaldyryp otyrǵan", - dep jazylǵan buǵan deiingi QMA málimetinde.
Artynsha QMA onyń zańsyz áreketiniń taǵy bir epizody anyqtalǵanyn habarlady.
"2023 jyldyń qarasha aiynda Perizat Qairat Palestina turǵyndaryna gýmanitarlyq kómek kórsetý úshin qarajat jinaýdy uiymdastyrdy. 2023 jylǵy jeltoqsanda osy aqsha esebinen Perizat Q. «Sensata Plaza» elitalyq kesheninen 49 mln teńgege úsh bólmeli páter jáne 30 mln teńgege «Mercedes-Benz EQE 500 4 Matic» jańa avtokóligin satyp aldy. Sonymen qatar, qarajattyń bir bóligi BAÁ-de «Rolex», «Prada» jáne «Fendi» brendtik býtikterinen zergerlik buiymdardy, saǵattar men kiimderdi satyp alýǵa jumsaldy", - dep jazylǵan habarlamada.
