پەريزات قايرات پەن اناسىنىڭ ءىسى سوتقا ءتۇستى، دەپ حابارلايدى Dalanews.kz.
باس پروكۋراتۋرا پەريزات قايراتقا جانە گايني الاشبايەۆاعا قاتىستى قىلمىستىق ءىستى ءمانى بويىنشا قاراۋ ءۇشىن استانا قالاسىنىڭ قىلمىستىق ىستەر جونىندەگى اۋدانارالىق سوتىنا جىبەردى.
ەكەۋى قازاقستان رەسپۋبليكاسىنىڭ ازاماتتارى مەن ۇيىمدارىنان مۇگەدەك بالالارعا، سونداي-اق قازاقستاندا سۋ تاسقىنىنان جانە تاياۋ شىعىستاعى قاقتىعىستان زارداپ شەككەن ادامدارعا قايىرىمدىلىق كورسەتۋ جەلەۋىمەن جينالعان 3 ميللياردتان استام تەڭگەنى جىمقىرۋدا ايىپتالادى.
ەسكە سالايىق، بۇعان دەيىن قارجىلىق مونيتورينگى اگەنتتىگى پەريزات قايرات پەن ونىڭ اناسى گايني الاشبايەۆاعا قاتىستى الاياقتىق جانە قىلمىستىق جولمەن الىنعان اقشا مەن مۇلىكتى زاڭداستىرۋ فاكتىلەرى بويىنشا سوتقا دەيىنگى تەرگەپ-تەكسەرۋدى اياقتادى.
2025 جىلعى 19 ناۋرىزدا تاراپتار 109 تومنان تۇراتىن قىلمىستىق ءىس ماتەريالدارىمەن تانىسۋعا كىرىستى.
بۇعان دەيىن حابارلانعانداي، زالال سوماسى 3،5 ملرد تەڭگەنى قۇرادى.
ۇرلانعان قاراجاتقا ساتىپ الىنعان 865 ملن تەڭگە كولەمىندەگى مۇلىككە تىيىم سالىندى.
قىلمىستىق ءىس ايىپتاۋ اكتىسىن بەكىتۋ جانە سوتقا جولداۋ ءۇشىن باس پروكۋراتۋراعا بەرىلدى.
