پرەزيدەنتتىڭ پايدالانىلماي جاتقان جانە زاڭسىز الىنعان اۋىل شارۋاشىلىعى ماقساتىنداعى جەرلەردى قايتارۋ جونىندەگى تاپسىرماسى اياسىندا 2025 جىلى مەملەكەت مەنشىگىنە 2،1 ملن گەكتار جەر قايتارىلدى، دەپ حابارلايدى Dalanews.kz
2022 جىلدان باستاپ قۇقىق قورعاۋ ورگاندارى مەن جۇرتشىلىقتىڭ قاتىسۋىمەن جەردى ءتيىمدى پايدالانۋ ماسەلەلەرى جونىندەگى رەسپۋبليكالىق كوميسسيا جۇمىس ىستەپ كەلەدى. 2025 جىلى كوميسسيانىڭ 3 وتىرىسى جانە وڭىرلەردە 42 وڭىرلىك كەڭەس وتكىزىلدى (قۇرىلعان كۇننەن بەرى رەسپۋبليكالىق كوميسسيانىڭ 18 وتىرىسى جانە وڭىرلەردەگى ۆەدومستۆوارالىق كىشى توپتاردىڭ 430 وتىرىسى وتكەن).
2022 جىلدان بەرى بارلىعى 14،3 ملن گەكتار جەر مەملەكەتتىك مەنشىككە قايتارىلدى (2022 جىلى – 5،4 ملن گەكتار، 2023 جىلى – 4،6 ملن گەكتار، 2024 جىلى – 2،2 ملن گەكتار، سونداي-اق 2025 جىلدىڭ باسىنان بەرى – 2،1 ملن گەكتار). ونىڭ ىشىندە 12،5 ملن گەكتارى – جايىلىمدىق جەرلەر. بۇل القاپتاردا 16،1 مىڭ شارۋاشىلىقتا مال بولماعان نەمەسە جايىلىمعا تۇسەتىن جۇكتەمەنىڭ تومەندىگى انىقتالعان.
2022 جىلدان بەرى مەملەكەتكە قايتارىلعان جەرلەردىڭ 7،7 ملن گەكتارى قايتا ءبولىندى:
-2،7 ملن گەكتار – مال جايۋ ءۇشىن ورتاق پايدالانۋعا بەرىلدى؛
-5 ملن گەكتار – كونكۋرستىق نەگىزدە ۇسىنىلدى.
سونىمەن قاتار، جەر پايدالانۋشىلار 4،6 ملن گەكتار القاپتا جەرلەرىن ءتيىمدى پايدالانۋعا كىرىستى.
پرەزيدەنتتىڭ جولداۋىندا بەلگىلەنگەن تاعى 7،5 ملن گەكتار جەردى قايتا ءبولۋ جۇمىستارى جالعاسۋدا. اكىمدىكتەرگە ءبىرىنشى كەزەكتە جەرگىلىكتى تۇرعىنداردىڭ جايىلىمعا دەگەن قاجەتتىلىكتەرىن جانە اۋىل شارۋاشىلىعىمەن اينالىسقىسى كەلەتىن ازاماتتاردىڭ مۇددەلەرىن ەسكەرۋ تاپسىرىلدى.
جوسپاردىڭ مەرزىمىنەن بۇرىن ورىندالۋى جەر رەسۋرستارىمەن جۇمىس ىستەۋدىڭ تيىمدىلىگىن، جەردى ۇتىمدى پايدالانۋ ءۇشىن جاعداي جاسالعانىن جانە قازاقستان اۋىل شارۋاشىلىعىنىڭ ودان ءارى دامۋىنا سەرپىن بەرىلگەنىن كورسەتەدى.
