Prezidenttiń paidalanylmai jatqan jáne zańsyz alynǵan aýyl sharýashylyǵy maqsatyndaǵy jerlerdi qaitarý jónindegi tapsyrmasy aiasynda 2025 jyly memleket menshigine 2,1 mln gektar jer qaitaryldy, dep habarlaidy Dalanews.kz
2022 jyldan bastap quqyq qorǵaý organdary men jurtshylyqtyń qatysýymen Jerdi tiimdi paidalaný máseleleri jónindegi respýblikalyq komissiia jumys istep keledi. 2025 jyly komissiianyń 3 otyrysy jáne óńirlerde 42 óńirlik keńes ótkizildi (qurylǵan kúnnen beri respýblikalyq komissiianyń 18 otyrysy jáne óńirlerdegi vedomstvoaralyq kishi toptardyń 430 otyrysy ótken).
2022 jyldan beri barlyǵy 14,3 mln gektar jer memlekettik menshikke qaitaryldy (2022 jyly – 5,4 mln gektar, 2023 jyly – 4,6 mln gektar, 2024 jyly – 2,2 mln gektar, sondai-aq 2025 jyldyń basynan beri – 2,1 mln gektar). Onyń ishinde 12,5 mln gektary – jaiylymdyq jerler. Bul alqaptarda 16,1 myń sharýashylyqta mal bolmaǵan nemese jaiylymǵa túsetin júktemeniń tómendigi anyqtalǵan.
2022 jyldan beri memleketke qaitarylǵan jerlerdiń 7,7 mln gektary qaita bólindi:
-2,7 mln gektar – mal jaiý úshin ortaq paidalanýǵa berildi;
-5 mln gektar – konkýrstyq negizde usynyldy.
Sonymen qatar, jer paidalanýshylar 4,6 mln gektar alqapta jerlerin tiimdi paidalanýǵa kiristi.
Prezidenttiń Joldaýynda belgilengen taǵy 7,5 mln gektar jerdi qaita bólý jumystary jalǵasýda. Ákimdikterge birinshi kezekte jergilikti turǵyndardyń jaiylymǵa degen qajettilikterin jáne aýyl sharýashylyǵymen ainalysqysy keletin azamattardyń múddelerin eskerý tapsyryldy.
Jospardyń merziminen buryn oryndalýy jer resýrstarymen jumys isteýdiń tiimdiligin, jerdi utymdy paidalaný úshin jaǵdai jasalǵanyn jáne Qazaqstan aýyl sharýashylyǵynyń odan ári damýyna serpin berilgenin kórsetedi.
