پاۆلوداردا بالاباقشادا تەربيەشٸسٸ بالالارعا كٷش كٶرسەتكەن. كادرلاردا ەيەل ادامنىڭ بٷلدٸرشٸندەردٸ شاشىنان تارتىپ, باسىنان ۇرعانى انىق كٶرٸنەدٸ. وقيعا №116 بالاباقشادا بولعان, دەپ حابارلايدى Dalanews.kz.
اتا-انالار بۇل كٶرٸنٸستەردٸ بەينەباقىلاۋ جٷيەسٸنەن كٶرگەن.
ولاردىڭ ايتۋىنشا, ۆيدەوجازبانىڭ ەربٸر كادرىندا تەربيەشٸنٸڭ بالالارعا كٷش قولدانعانى كٶرٸنەدٸ.
“قاتىگەزدٸك قاي ۋاقىتتان بەرٸ جالعاسىپ كەلگەنٸ بەلگٸسٸز, ٶيتكەنٸ كەيبٸر سەتتەر بەينەجازبادان ٶشٸرٸلٸپ قالعان”, – دەيدٸ اتا-انالار.
مەسەلەگە پاۆلودار وبلىسى بويىنشا بالا قۇقىقتارى جٶنٸندەگٸ ۋەكٸل سەۋلە شاكەنوۆا دا نازار اۋدارىپ, اتا-انالاردىڭ شاعىمىنان كەيٸن بٸردەن بالاباقشاعا بارعانىن ايتتى.
“كەشە اتا-انالارمەن بٸرگە №116 بالاباقشادا بولىپ, ۆيدەوجازبالاردى كٶردٸك. پوليتسييا قىزمەتكەرلەرٸ جازبالاردى ساراپتاۋ ٷشٸن رەسيۆەردٸ الىپ كەتتٸ, اتا-انالاردىڭ ٶتٸنٸشتەرٸن تٸركەدٸ. بالالارعا سوت-مەديتسينالىق ساراپتاما تاعايىندالدى. بۇل توپتاعى بٷلدٸرشٸندەردٸڭ كٶبٸ 2022 جىلى تۋعان, كٶپشٸلٸگٸ ەلٸ دۇرىس سٶيلەي المايدى”, – دەدٸ شاكەنوۆا.
وبلىستىق پوليتسييا دەپارتامەنتٸ بولعان وقيعا بويىنشا قىلمىستىق كودەكستٸڭ 140-بابى (“كەمەلەتكە تولماعان بالانى تەربيەلەۋ جٶنٸندەگٸ مٸندەتتەردٸ ورىنداماۋ”) اياسىندا ٸس قوزعالعانىن حابارلادى.
“قازٸرگٸ ۋاقىتتا تەربيەشٸنٸڭ ەرەكەتتەرٸنە قۇقىقتىق باعا بەرۋ ٷشٸن تەرگەۋ جٷرگٸزٸلٸپ جاتىر. سونىمەن قاتار, بالاباقشا ەكٸمشٸلٸگٸنٸڭ دە بۇل جاعدايعا بايلانىستى ٸس-ەرەكەتتەرٸ تەكسەرٸلەتٸن بولادى”, – دەپ مەلٸمدەدٸ پوليتسييا ٶكٸلدەرٸ.
