پاۆلودار وبلىسىندا 19 ماۋسىمدا سوققان دۇلەي داۋىلدىڭ سالدارىنان تاعى ءبىر تۇرعىن قايتىس بولدى،- دەپ حابارلايدى Dalanews.kz
بەلگىلى بولعانداي، ەكىباستۇز قالاسىنداعى جەكە ۇيلەردىڭ بىرىندە تۇراتىن 76 جاستاعى ايەلدىڭ ۇستىنە اۋلاسىنداعى اعاش قۇلاعان. زەينەتكەر اۋىر جاراقاتپەن بىردەن اۋرۋحاناعا جەتكىزىلگەن.
– 19 ماۋسىمدا جەدەل جاردەم قىزمەتى 76 جاستاعى ناۋقاستى ەكىباستۇز قالالىق اۋرۋحاناسىنىڭ قابىلداۋ بولىمىنە جەتكىزدى. ايەل ادامنىڭ ايتۋىنشا، ونىڭ ۇستىنە ءۇي اۋلاسىنداعى اعاش قۇلاعان. ول اۋىر حالدە جانساقتاۋ بولىمىنە جاتقىزىلدى، – دەدى وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتى.
دارىگەرلەر زەينەتكەردىڭ ءومىرى ءۇشىن ءبىر اپتا بويى كۇرەسكەنىمەن، وكىنىشكە قاراي، ونىڭ ءومىرىن ساقتاپ قالا المادى. اق حالاتتىلاردىڭ ايتۋىنشا، دەنە جاراقاتتارىنان بولەك، ايەل ادامنىڭ قانت ديابەتى مەن جۇرەك اۋرۋى دا جاعدايدى ۋشىقتىرا تۇسكەن.
ەسكە سالايىق، ءدال سول كۇنى اقسۋ قالاسىندا اعاشتىڭ سىنىعى كولىكتە وتىرعان ايەلدىڭ كەۋدەسىنە قادالىپ، ول وقيعا ورنىندا كوز جۇمعان بولاتىن.
جالپى، داۋىل سالدارىنان سول كۇنى 16 ادام دارىگەر كومەگىنە جۇگىنگەن، ولاردىڭ ۇشەۋى – بالالار. بۇگىندە بارلىعى ۇيلەرىنە شىعارىلدى.
