پاۆلودار وبلىسىندا پروكۋراتۋرا اليمەنت تولەمەگەن بورىشكەرلەردى جاۋاپكەرشىلىككە تارتىپ، قارىزدى ءوندىرۋ جۇمىستارىن كۇشەيتىپ جاتىر. تەك قاڭتار ايىندا اليمەنت تولەۋدەن ادەيى جالتارعانى ءۇشىن ءۇش ازامات سوتپەن كىنالى دەپ تانىلدى. تاعى جەتى قىلمىستىق ءىس بويىنشا تەرگەۋ جۇرگىزىلىپ جاتىر، دەپ حابارلايدى Dalanews.kz.
فبرك تەلەگرام ارناسىنىڭ مالىمەتىنشە، پروكۋراتۋرا اليمەنت تولەمەيتىندەرگە قاتىستى ءبىرقاتار شارا قولدانۋدا. ولاردىڭ قاتارىندا شەتەلگە شىعۋعا شەكتەۋ قويۋ، اكىمشىلىك جانە قىلمىستىق جاۋاپكەرشىلىككە تارتۋ، سونداي-اق سيفرلىق ىزدەستىرۋ بار.
پروكۋراتۋرا مالىمەتىنشە، ءبىر بورىشكەر ءۇش جىل بويى تولەمنەن جالتارىپ، تابىسىن جاسىرعان. سونىڭ سالدارىنان ءۇش كامەلەتكە تولماعان بالاسىنا 2،2 ملن تەڭگە قارىز جيناعان. ەكىنشى بورىشكەر التى جىلدان استام ۋاقىت اليمەنت تولەمەگەن. جۇمىسقا ورنالاسۋ مۇمكىندىگى بولا تۇرا، ونىڭ قارىزى 4 ملن تەڭگەدەن اسقان.
ءۇش ازاماتتىڭ بارلىعى قىلمىستىق كودەكستىڭ 139-بابى بويىنشا سوتتالدى. قازىرگى ۋاقىتتا تاعى جەتى قىلمىستىق ءىس بويىنشا سوتقا دەيىنگى تەرگەۋ جالعاسۋدا.
سونىمەن قاتار اليمەنت قاراجاتىنا قاتىستى زاڭبۇزۋشىلىقتار دا انىقتالعان. قاراشا ايىندا باس پروكۋراتۋرا جەكە سوت ورىنداۋشىسىنىڭ اليمەنت اقشاسىن جىمقىرعانىن حابارلاعان. ول جارتى جىل بويى بورىشكەرلەردەن تۇسكەن تولەمدەردى جەكە قاجەتىنە جۇمساعان. ناتيجەسىندە 34 بالاعا 1،2 ملن تەڭگە كولەمىندە زيان كەلتىرىلگەن.
سول كەزدە الماتىدا اليمەنت وندىرۋگە بايلانىستى التى ءىس بويىنشا جەكە سوت ورىنداۋشىلارىنىڭ زاڭبۇزۋشىلىقتارى انىقتالدى. ال ماڭعىستاۋ وبلىسىندا سوت ورىنداۋشىسى ءوندىرىپ الۋشىنىڭ ءوتىنىشىن قولدان جاساپ، شەكتەۋدى زاڭسىز الىپ تاستاعانى ءۇشىن بورىشكەردەن اقشا العان.
