«START» اكادەميالىق ىقپالدىلىق باعدارلاماسىنىڭ ىسكە قوسىلۋىنا وراي بۇۇ-نىڭ شتاب پاتەرىندە وتكەن حالىقارالىق فورۋم قازاقستاننان بەرىلگەن تىكەلەي ۆيدەوترانسلياسيادان باستالدى. ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى، اكادەميك عالىم مۇتانوۆ تۇراقتى دامۋ بويىنشا ۇيىمداستىرىلعان جوبادا ءبىرىنشى بولىپ ءسوز سويلەدى. بۇگىنگى تاڭدا يكەمدىلىك پەن تەحنولوگيانىڭ دامۋ ماڭىزدىلىعىن اتاپ، بۇۇ-نىڭ تۇراقتى دامۋ باعدارلاماسىنا، ونىڭ ىشىندە، بۇۇ-نىڭ باس اسسامبلەياسى قابىلداعان «الەمنىڭ جاندانۋى: 2030 جىلعا دەيىنگى تۇراقتى دامۋدىڭ كۇن ءتارتىبى» قۇجاتىنا باسا نازار اۋداردى. بۇۇ-نىڭ حالىقارالىق حابى، يۋنەسكو-نىڭ تۇراقتى دامۋ بويىنشا ايماقتىق حابى سانالاتىن قازۇۋ-دىڭ تاجىريبەسىن ستەنفورد، كەمبريدج، وكسفورد ۋنيۆەرسيتەتتەرى، سينگاپۋردىڭ ۇلتتىق ينستيتۋتى سەكىلدى 30-دان اسا الەمنىڭ كوشباسشى جوعارى وقۋ ورىندارىنىڭ باسشىلارى زەرتتەپ جاتىر.
ءال-فارابي اتىنداعى قازاق ۇلتتىق ۋنيۆەرسيتەتىنىڭ ءبىرىنشى پرورەكتورى مۇحامبەتقالي بۇركىتبايەۆ اتاپ وتكەنىندەي: «START» اببريەۆياتۋراسى اعىلشىن تىلىنەن اۋدارعاندا: عىلىم، قابىلەت پەن تەحنولوگيالار الەمدى تەز وزگەرتەدى دەگەن ماعىنا بەرەدى. پان گي مۋننىڭ باستاماسىمەن قۇرىلعان اكادەميالىق ىقپالدىلىق باعدارلاماسى بۇۇ قاراستىراتىن وزەكتى ماسەلەلەردى شەشۋ ءۇشىن ۋنيۆەرسيتەتتەردىڭ زياتكەرلىك مۇمكىندىكتەرىن پايدالانۋدى كوزدەيدى. ۇيىمنىڭ باس حاتشىسى قازۇۋ-دى حاب بولىپ تاعايىندالعانىمەن قۇتتىقتاپ، ۋنيۆەرسيتەت ءوزىن حالىقارالىق دارەجەدە كورسەتەتىنىنە سەنىم ءبىلدىردى».
وسىعان وراي، الەمنىڭ ۇزدىك جوعارى وقۋ ورىندارى قازاقستانعا ەرەكشە نازار اۋدارىپ وتىر. سەبەبى، بۇۇ ساراپشىلارى مەن عىلىمي الەم ءدال ءبىزدىڭ ەلدە يننوۆاسيالىق دامۋدىڭ جوعارى تەحنولوگيالىق مۇمكىندىكتەرىن اشۋدا. ءال-فارابي اتىنداعى قازاق ۇلتتىق ۋنيۆەرسيتەتى ارىپتەستىكتىڭ حالىقارالىق دەڭگەيىنە كوتەرىلىپ، سول ارقىلى بارلىق قازاقستاندىق ءبىلىم بەرۋ جۇيەسىنىڭ باسەكەگە قابىلەتتىلىگىن ارتتىرۋدا.
«ءبىز ۋنيۆەرسيتەتتىڭ عىلىمي-اعارتۋشىلىق قىزمەتىنىڭ ءبىر دالەلى رەتىندە ءال-فارابي اتىنداعى قازاق ۇلتتىق ۋنيۆەرسيتەتىندە اشىلعان، جوعارى ءبىلىم بەرۋ جۇيەسىندەگى العاشقى رادياسيالىق ەكولوگيا لابوراتورياسىن مىسالعا كەلتىردىك. بۇگىندە لابوراتوريا بارلىق جاساندى جانە تابيعي راديونۋكلەيدتەرگە ساراپتاما جاساۋعا قاۋقارلى»، - دەپ اتاپ ءوتتى مۇحامبەتقالي بۇركىتبايەۆ.
بيىل ءال-فارابي اتىنداعى قازاق ۇلتتىق ۋنيۆەرسيتەتىندە اعىلشىن تىلىندە ءبىلىم بەرەتىن «تۇراقتى دامۋ» ماگيسترلىك باعدارلاماسى اشىلدى. باعدارلامانىڭ نەگىزگى سەرىكتەسى كولۋمبيالىق نيۋ-يورك ۋنيۆەرسيتەتى. الداعى ۋاقىتتا جاڭا تەحنولوگيالارمەن جانە عىلىمي زەرتتەۋ جۇمىستارىمەن ەۋرازيالىق ورتالىق اشۋ جوسپاردا بار.
قازۇۋ باسپا ءسوز قىزمەتى
