مىنە، وسى ماسەلەلەر تالقىعا سالىپ، شەشۋ جولدارىن ۇسىنعان كونفەرەنسيانى الماتى قالاسى ورتالىقتاندىرىلعان كىتاپحانا جۇيەسىنە قاراستى قازاقستان جازۋشىلارى كىتاپحاناسى ۇيىمداستىردى.
كونفەرەنسيانى اشقان كىتاپحانا مەڭگەرۋشىسى ەلەنا جامەل قىزى ماقساتىن ءتۇسىندىرىپ، بۇگىنگى تاڭدا قوعامدى الاڭداتىپ وتىرعان ماسەلەلەردى ايتىپ، ونىڭ شەشۋ جولىن ۇسىنۋعا جينالعان قوناقتاردى تانىستىرىپ ءوتتى. مودەراتورلاردىڭ كىرىسپە سوزىنەن كەيىن العاشقى ءسوزدى جازۋشى-دراماتۋرگ، حالىقارالىق «الاش» ادەبي سىيلىعىنىڭ يەگەرى ءسۇلتانالى بالعابايەۆ الىپ، وزەكتى پروبلەمانىڭ نەگىزگىسى – جەمقورلىققا توقتالدى. جۇيەنى جەگى قۇرتتاي جەپ جاتقان جەڭ ۇشىنان جالعاسقان جەمقورلىقتى جويماي باسقا ماسەلەنىڭ ۇشىعىنا جەتە المايتىنىمىزدى تۇسىندىرە، ناقتىلاي ايتىپ كەتكەن جازۋشى اعامىزدىڭ ءسوزى قاتىسۋشىلار تاراپىنان قولداۋ تاپتى.
ال اقىن، جازۋشى، جۋرناليست ساۋلە دوسجان بولسا كەلەر ۇرپاقتىڭ قارنى توق بولىپ، ساناسى جوق بولسا جاھاندانۋ جۇتىپ قوياتىنىن ەسكەرتە سويلەدى. «جاھاندانۋدىڭ ورتاسىندا ءومىر سۇرە وتىرىپ، ءتۇپ-تامىرىمىزدان قول ۇزبەي، قازىنالى قاسيەتتەرىن ودان ارمەن دارىپتەي، ۇرپاق بويىنا قانمەن سىڭىرە ءبىلۋىمىز كەرەك. جاس ۇرپاق مۇمكىندىگىنشە الدىڭعى تولقىننىڭ جىبەرگەن قاتەلىكتەرىن قايتالاماۋعا تىرىسىپ، ۇلتتىق اسىل قاسيەتتەرىمىزدى وركەندەتۋگە كۇش سالسا، ءبىز ەشقاشان ۇلت رەتىندە جويىلىپ كەتپەيمىز»،- دەپ جاستارعا قاراتا سويلەگەن ءسوزى ءبىراز جاستىڭ ساناسىن سەرپىلتتى دەۋگە بولادى. ال بالالار جازۋشىلارى نۇرتان تولەپبەرگەن، نۇرداۋلەت اقىش، ءسابيت دۇيسەنبييەۆ ءوز شىعارمالارىنان ءۇزىندى وقىپ، موتيۆاسيا بەرە وتىرىپ جاستاردى كىتاپ وقۋعا شاقىردى.
كونفەرەنسياعا سپيكەر رەتىندە شاقىرىلعان «سەنىمەن بولاشاق» رقب الماتى فيليالىنىڭ ساراپشىلارى – پسيحولوگ ايگۇل يسلامبەك قىزى مەن نۋتريسولوگ ەركەجان مارات قىزىنىڭ بايانداماسى كوپشىلىكتىڭ كوڭىلىنەن شىقتى. پسيحولوگ مامان قازىرگى دەرتتىڭ ءبىرى – لۋدومانيا تۋرالى بايانداپ، ستاتيستيكالىق مالىمەتتەردى كەلتىرە وتىرىپ ويىنقۇمارلىقتىڭ جاستاردى دا شىرماپ، ورعا جىعىپ جاتقانىن اشىنا جەتكىزدى. وسى دەرتپەن بىرلەسە كۇرەسۋگە شاقىردى. ال ەركەجان حانىم بولسا جاستاردىڭ فاسفۋد ونىمدەرىنە شەكسىز قۇمارلىعىنان نەشە ءتۇرلى اۋرۋلاردىڭ جاسارىپ جاتقانىن، ەنەرگەتيك سۋسىنداردىڭ زياندىلىعىن تۇسىنىكتى تۇردە جەتكىزىپ، جاستار تاراپىنان قويىلعان سۇراقتارعا جاۋاپ بەردى.
كونفەرەنسيادا سونداي-اق «پاراسات» الەۋمەتتىك قىزمەت كورسەتۋ ورتالىعى ديرەكتورىنىڭ ورىنباسارى باقىت تاسجانوۆا، اۋەزوۆ اۋداندىق پوليسيا باسقارماسىنىڭ اعا ينسپەكتورى گۇلزينا مۇحامەتقالييەۆا، قازاقستان جازۋشىلارى كىتاپحاناسىنىڭ قىزمەتكەرى نازەركە جۇنىسبەك، «الاتاۋ» قوعامدىق بىرلەستىگىنىڭ جەتەكشىسى ساعىمحان نۇرمۇحامەت قىزى، №15 قالالىق ەمحاناسى باس دارىگەرىنىڭ ورىنباسارى ءاليا وتەمىسوۆا، «زاعيپ جانە ناشار كورەتىن ازاماتتارعا ارنالعان رەسپۋبليكالىق كىتاپحانانىڭ» كىتاپحاناشىسى الماس مىرزابەكوۆتەر كەزەكپەن ءسوز الىپ، ايەلدەردى زورلىق-زومبىلىقتان قورعاۋ، ماسكۇنەمدىك پەن ناشاقورلىقتىڭ دەندەۋى، مۇگەدەكتىگى بار جاندارمەن جۇمىس بارىسىندا كەزدەسەتىن قيىنشىلىقتار توڭىرەگىندەگى باياندامالارىن وقىپ، تالقىعا سالىپ، شەشۋ جولدارىن ۇسىندى.
- قوعامداعى وزەكتى ماسەلەلەر كىتاپحانا ۇجىمىن بەي-جاي قالدىرعان ەمەس. ويتكەنى ءار ماسەلەنىڭ ارتىندا ادامدىڭ تاعدىرى مەن وتباسى قۇندىلىعى تۇر. قالىپتى ءومىر ىرعاعىن بۇزاتىن جاعىمسىز ارەكەتتەر ايتىلىپ، شەشۋ جولىن ۇسىنۋعا ارنالعان مۇنداي باسقوسۋلار الداعى ۋاقىتتا دا جالعاساتىن بولادى. ويتكەنى كىتاپحاناعا كوپتەگەن زيالى قاۋىم وكىلدەرىمەن بىرگە جاستار دا كوپ كەلەدى. كەلەشەكتىڭ تىرەگى سانالاتىن جاستاردىڭ ساناسىن وسىنداي جيىندار، ارەكەتتەر ارقىلى وياتىپ، تاربيەلى دە پاراساتتى تۇلعا بولىپ قالىپتاسۋىنا ىقپال ەتۋىمىز كەرەك- دەيدى كىتاپحانا قىزمەتكەرى سىمبات اسانوۆا.
مەرۋەرت ماۋلەت قىزى،
«سەنىمەن بولاشاق» رقب ءجۋرناليسى
