Mine, osy máseleler talqyǵa salyp, sheshý joldaryn usynǵan konferentsiany Almaty qalasy ortalyqtandyrylǵan kitaphana júiesine qarasty Qazaqstan Jazýshylary kitaphanasy uiymdastyrdy.
Konferentsiiany ashqan kitaphana meńgerýshisi Elena Jamelqyzy maqsatyn túsindirip, búgingi tańda qoǵamdy alańdatyp otyrǵan máselelerdi aityp, onyń sheshý jolyn usynýǵa jinalǵan qonaqtardy tanystyryp ótti. Moderatorlardyń kirispe sózinen keiin alǵashqy sózdi jazýshy-dramatýrg, halyqaralyq «Alash» ádebi syilyǵynyń iegeri Sultanáli Balǵabaev alyp, ózekti problemanyń negizgisi – jemqorlyqqa toqtaldy. Júieni jegi qurttai jep jatqan jeń ushynan jalǵasqan jemqorlyqty joimai basqa máseleniń ushyǵyna jete almaitynymyzdy túsindire, naqtylai aityp ketken jazýshy aǵamyzdyń sózi qatysýshylar tarapynan qoldaý tapty.
Al aqyn, jazýshy, jýrnalist Sáýle Dosjan bolsa keler urpaqtyń qarny toq bolyp, sanasy joq bolsa jahandaný jutyp qoiatynyn eskerte sóiledi. «Jahandanýdyń ortasynda ómir súre otyryp, túp-tamyrymyzdan qol úzbei, qazynaly qasietterin odan ármen dáriptei, urpaq boiyna qanmen sińire bilýimiz kerek. Jas urpaq múmkindiginshe aldyńǵy tolqynnyń jibergen qatelikterin qaitalamaýǵa tyrysyp, ulttyq asyl qasietterimizdi órkendetýge kúsh salsa, biz eshqashan ult retinde joiylyp ketpeimiz»,- dep jastarǵa qarata sóilegen sózi biraz jastyń sanasyn serpiltti deýge bolady. Al balalar jazýshylary Nurtan Tólepbergen, Nurdáýlet Aqysh, Sábit Dúisenbiev óz shyǵarmalarynan úzindi oqyp, motivatsiia bere otyryp jastardy kitap oqýǵa shaqyrdy.
Konferentsiiaǵa spiker retinde shaqyrylǵan «Senimen bolashaq» RQB Almaty filialynyń sarapshylary – psiholog Aigúl Islambekqyzy men nýtritsolog Erkejan Maratqyzynyń baiandamasy kópshiliktiń kóńilinen shyqty. Psiholog maman qazirgi derttiń biri – lýdomaniia týraly baiandap, statistikalyq málimetterdi keltire otyryp oiynqumarlyqtyń jastardy da shyrmap, orǵa jyǵyp jatqanyn ashyna jetkizdi. Osy dertpen birlese kúresýge shaqyrdy. Al Erkejan hanym bolsa jastardyń fasfýd ónimderine sheksiz qumarlyǵynan neshe túrli aýrýlardyń jasaryp jatqanyn, energetik sýsyndardyń ziiandylyǵyn túsinikti túrde jetkizip, jastar tarapynan qoiylǵan suraqtarǵa jaýap berdi.
Konferentsiiada sondai-aq «Parasat» áleýmettik qyzmet kórsetý ortalyǵy direktorynyń orynbasary Baqyt Tasjanova, Áýezov aýdandyq politsiia basqarmasynyń aǵa inspektory Gúlzina Muhametqalieva, Qazaqstan Jazýshylary kitaphanasynyń qyzmetkeri Nazerke Júnisbek, «Alataý» qoǵamdyq birlestiginiń jetekshisi Saǵymhan Nurmuhametqyzy, №15 qalalyq emhanasy bas dárigeriniń orynbasary Áliia Ótemisova, «Zaǵip jáne nashar kóretin azamattarǵa arnalǵan respýblikalyq kitaphananyń» kitaphanashysy Almas Myrzabekovter kezekpen sóz alyp, áielderdi zorlyq-zombylyqtan qorǵaý, maskúnemdik pen nashaqorlyqtyń dendeýi, múgedektigi bar jandarmen jumys barysynda kezdesetin qiynshylyqtar tóńiregindegi baiandamalaryn oqyp, talqyǵa salyp, sheshý joldaryn usyndy.
- Qoǵamdaǵy ózekti máseleler kitaphana ujymyn bei-jai qaldyrǵan emes. Óitkeni ár máseleniń artynda adamdyń taǵdyry men otbasy qundylyǵy tur. Qalypty ómir yrǵaǵyn buzatyn jaǵymsyz áreketter aitylyp, sheshý jolyn usynýǵa arnalǵan mundai basqosýlar aldaǵy ýaqytta da jalǵasatyn bolady. Óitkeni kitaphanaǵa kóptegen ziialy qaýym ókilderimen birge jastar da kóp keledi. Keleshektiń tiregi sanalatyn jastardyń sanasyn osyndai jiyndar, áreketter arqyly oiatyp, tárbieli de parasatty tulǵa bolyp qalyptasýyna yqpal etýimiz kerek- deidi kitaphana qyzmetkeri Symbat Asanova.
Merýert Máýletqyzy,
«Senimen bolashaq» RQB jýrnalisi
