ب ا ق مالىمەتىنشە، ەتنيكالىق قازاق وزبەكستاندىق بوكسشى سايات يلياسوۆ قازاقستان ازاماتتىعىن الۋعا شەشىم قابىلداعان. الايدا قازاقستان بوكس فەدەراسياسى بۇل مامىلە ءالى اياقتالۋعا جاقىن ەمەس ەكەنىن مالىمدەدى، دەپ حابارلايدى Dalanews.kz.
Vesti.kz پورتالى جۋرناليست اسلان كاجەنوۆكە سىلتەمە جاساپ، 22 جاسقا دەيىنگى جاستار اراسىنداعى ازيا چەمپيونى وزبەكستان قۇراماسىنان شىعىپ، قازاقستان ۇلتتىق قۇراماسىنا وتۋگە تالپىنىپ جاتقانىن حابارلادى.
باق-تا تاراعان اقپاراتقا سايكەس، ەتنيكالىق قازاق ىشكى جارىستاردا ماڭعىستاۋ وبلىسىنىڭ نامىسىن قورعاۋى مۇمكىن. سونىمەن قاتار ول ناۋرىز ايىندا قازاقستاندىق پروموۋشەندەردىڭ بىرىندە كاسىپقوي بوكستا دەبيۋت جاساۋدى جوسپارلاپ وتىر.
الايدا قازاقستان بوكس فەدەراسياسى قازىرگى تاڭدا يلياسوۆتى وزبەكستان فەدەراسياسىنان بوساتۋ تۋرالى ەشقانداي رەسمي قۇجات تۇسپەگەنىن ايتتى.
«بۇگىنگە دەيىن قازاقستان بوكس فەدەراسياسىنا وزبەكستان سپورتشىسى - سايات يلياسوۆتى تىركەۋدەن شىعارۋ جونىندە ەشقانداي حات كەلىپ تۇسكەن جوق. ازاماتتىقتى اۋىستىرۋ جانە باسقا ەلدىڭ اتىنان ونەر كورسەتۋ - ۇزاق ءارى كۇردەلى پروسەسس. ازاماتتىقتان بولەك، سپورتشى حالىقارالىق فەدەراسيا تالاپتارىنا ساي سپورتتىق ازاماتتىعىن دا وزگەرتۋى ءتيىس. بۇل ۇلتتىق فەدەراسيانىڭ رەسمي ءوتىنىشى نەگىزىندە جۇزەگە اسىرىلادى. سونداي-اق كەيىن ۇلتتىق قۇراما قاتارىنا ەنۋ ءۇشىن سپورتشى قازاقستان چەمپيوناتىنىڭ سوڭعى ناتيجەلەرى بويىنشا جۇلدەگەرلەر قاتارىندا بولۋى قاجەت»، - دەپ جاۋاپ بەردى قازاقستان بوكس فەدەراسياسى Tengri Sport رەسمي ساۋالىنا.
ايتا كەتەيىك، سايات يلياسوۆ - 63،5 كەلى سالماق دارەجەسىندە وزبەكستان چەمپيوناتىنىڭ قولا جۇلدەگەرى، سونداي-اق U-22 ساناتىنداعى ازيا چەمپيونى.
