وزبەكستان تەلەارنالارى ەلدىڭ ءبىرىنشى پرەزيدەنتى يسلام كاريموۆكە تاشكەنتتەن، سامارقاننان جانە قارشيدەن ەسكەرتكىش ورناتادى دەپ حابارلادى. پرەزيدەنت شاۆكات ميرزيايەۆ جوبالارمەن جەكە تانىسىپ، مەموريال كەشەنىن وزبەكستان تاۋەلسىزدىگىنىڭ 26 جىلدىعىنا قارسى اياقتاۋدى بۇيىرعان.
وزبەكستاننىڭ «احبوروت» تەلەارناسىندا پرەزيدەنت شاۆكات ميرزيايەۆتىڭ سويلەگەن ءسوزىن كورسەتكەن. وندا وزبەكستان باسشىسى «ءبىزدىڭ حالىق جانە الەمدىك قاۋىمداستىق يسلام كاريموۆتىڭ ەسىمىن دجوردج ۆاشينگتون، شارل دە گولل جانە مۇستافا كەمال اتاتۇرىك سەكىلدى ءبىرتۋار مەملەكەتتىك جانە ساياسي تۇلعالارمەن قاتار قويادى» دەگەن.
رەسمي حابارلامادا ايتىلعانداي، وزبەكستان تاۋەلسىزدىگىنىڭ 26 جىلدىعى قارساڭىندا تاشكەنتتەگى ءبىرىنشى پرەزيدەنت وتىرعان اقساراي رەزيدەنسياسى الدىندا ەسكەرتكىش ورناتىلىپ، عىلىمي-اعارتۋ مەموريال كەشەنى اشىلادى. سول سەكىلدى سامارقان قالاسىنىڭ ورتالىعى مەن كاريموۆتىڭ ەڭبەك جولى باستالعان قارشي قالاسىنداعى ساياباقتا تۇڭعىش پرەزيدەنتتىڭ ءمۇسىنى ورناتىلادى.
بىلتىر رەسەي پرەزيدەنتى ۆلاديمير پۋتين دە يسلام كاريموۆكە ماسكەۋدەن ەسكەرتكىش سالىناتىنىن ايتقان. ول ماسكەۋ قالالىق دۋماسىنىڭ شەشىمى بويىنشا، بولشايا پوليانكا كوشەسىندەگى ساياباقتان ورىن تەبەتىن بولدى. تۇركىمەنستاندا الاڭ مەن ساياباققا يسلام كاريموۆتىڭ ەسىمى بەرىلدى. ول 2016 جىلدىڭ 2 قىركۇيەگىندە 78 جاسىندا ميىنا قان كەتىپ قايتىس بولدى. سامارقانداعى ءقابىرى بۇگىندە قۇرمەت كورسەتۋ ورنىنا اينالعان.
