كەشە, 26 جەلتوقساندا كەشكٸسٸن اقتاۋدا ٶتكەن باسپاسٶز مەسليحاتىندا كٶلٸك مينيسترٸ مارات قاراباەۆ ۇشاق اپاتىنىڭ قالاي بولعانىن ايتىپ,حرونولوگيياسىن تٸزبەكتەدٸ. وقيعا ورنىندا ەزٸربايجاننىڭ اۆياتسييالىق بيلٸگٸمەن تىعىز ىنتىماقتاستىقتا جۇمىستار جٷرگٸزٸلٸپ جاتىر, دەپ جازادى Dalanews.kz.
مينيستردٸڭ ايتۋىنشا, ۇشاق اقتاۋ ەۋەجايىنىڭ ۇشۋ-قونۋ جولاعىنا جاقىنداۋعا ەكٸ رەت ەرەكەت جاساعان.
- بەيٸندٸ ۆەدومستۆونىڭ كٶلٸكتەگٸ وقيعالار مەن ينتسيدەنتتەردٸ تەرگەۋ دەپارتامەنتٸنٸڭ قىزمەتكەرلەرٸ تەرگەۋدٸڭ دالالىق كەزەڭٸن ٶتكٸزٸپ جاتىر.
- ەۋەجايدىڭ تٶتەنشە جاعدايلار قىزمەتٸ ۇشاقتى قابىلداۋعا دايىن بولدى. ەكيپاج قر ەۋە كەڭٸستٸگٸنە كٸرگەننەن كەيٸن اقتاۋ قالاسىنىڭ مۇنارالىق ديسپەتچەرٸمەن بايلانىس ورناتتى. ديسپەچەر ەۋە كەمەسٸن قوندىرۋ ٷشٸن بارلىق قاجەتتٸ ٸس-قيمىلداردى جەدەل كٶرسەتتٸ.
- ەكيپاج باعىت پەن بيٸكتٸكتٸ تۇراقتى ۇستاپ تۇرا المادى. روستوۆ-نا-دونۋدىڭ ديسپەتچەرٸ ماحاچكالا مەن باكۋدەگٸ اۋا-رايى تۋرالى مەلٸمەتتەردٸ جەتكٸزگەننەن كەيٸن ەكيپاج اقتاۋعا ۇشۋ تۋرالى شەشٸم قابىلداعانىن حابارلادى.
- ساعات 10:53-تە روستوۆ-نا-دونۋ ۇشۋلارى جەتەكشٸسٸ اقتاۋداعى ۇشۋلار باسشىسىنا ۇشاقتىڭ جولاۋشىلار كابيناسىندا وتتەگٸ باللونى جارىلعانىن, جولاۋشىلار ەسٸنەن تانا باستاعانىن قوسىمشا حابارلاپ, كەلٸپ جەتكەندە ۇشاقتاعىلارعا رەانيماتسييالىق شارالار كەرەك بولاتىنىن ايتقان.
- جولاقتىڭ ۆيزۋالدى كٶرٸنٸسٸ انىق بولۋى ٷشٸن شامدار قوسىلدى.
- ەكپيپاج اقتاۋ ەۋەايلاعىنىڭ ۇشۋ-قونۋ الاڭىنا جاقىنداۋ ٷشٸن ەكٸ رەت ەرەكەت جاسادى, ونىڭ بارىسىندا ۇشاقتىڭ رەتسٸز شايقالعانى بايقالدى.
- ۇشاق جاعالاۋ سىزىعىنا قاراي اۋىتقيدى. ساعات 11:28-دە ەكيپاجمەن بايلانىس ٷزٸلٸپ, ەۋە كەمەسٸ جەرمەن سوقتىعىستى.
- بٸردەن ەۋە كەمەسٸ قۇلاعان جەرگە بٸرٸنشٸ بولىپ اقتاۋ ەۋەجايىنىڭ قۇتقارۋ قىزمەتٸ كەلٸپ جەتتٸ, ولار بورتتاعى جولاۋشىلاردى دەرەۋ ەۆاكۋاتسييالاۋعا كٸرٸستٸ.
بۇعان دەيٸن قر تجم باسپاسٶز قىزمەتٸ ەزٸربايجان ەۋە كومپانيياسىنا تيەسٸلٸ ۇشاق اپاتىنان قازا تاپقانداردىڭ تٸزٸمٸن جارييالاعان بولاتىن. قايعىلى وقيعا 25 جەلتوقساندا تٷسكە قاراي بولدى. باكۋدەن گروزنىيعا باعىت العان جولاۋشىلار ۇشاعى اقتاۋ ەۋەجايىنىڭ ماڭىندا اپاتقا ۇشىرادى. سوڭعى اقپارات بويىنشا, 67 ادامنىڭ 29-ى امان قالدى, 38 جولاۋشى قازا تاپتى, ولاردىڭ ٸشٸندە ۇشاق ەكيپاجى دا بار. ۇشاقتا قازاقستاننىڭ التى ازاماتى بولعانى بەلگٸلٸ بولدى, ٶكٸنٸشكە قاراي ولاردىڭ بارلىعى مەرت بولدى. وقيعا ورنىنان ۇشاقتىڭ ەكٸ "قارا جەشٸگٸ" تابىلدى. ولاردىڭ ۇشاقتى جاساپ شىققان برازيلييا كومپانيياسىنىڭ ماماندارى كەلمەيٸنشە, اشىلمايتىنى ايتىلادى.
