تۇركىستان وبلىسىنىڭ اكىمى ءومىرزاق شوكەيەۆ ارنايى جۇمىس ساپارىمەن وتىرار اۋدانىنا باردى. ونداعى ءبىرقاتار نىسانداردى ارالاپ، اتقارىلىپ جاتقان جۇمىستارمەن تانىستى.

الدىمەن ايماق باسشىسى قوعام اۋىلدىق وكرۋگىندەگى «وتىرار-قۇرال» ءجشس-نىڭ قارقىندى باۋىنا ايالدادى. الما وسىرۋمەن اينالىساتىن سەرىكتەستىك 2019 جىلى قۇرىلعان. جوبانىڭ ينۆەستيسيالىق قۇنى 200 ملن. تەڭگەنى قۇرايدى. سەرىكتەستىكتىڭ مەنشىگىندە 50 گەكتار جەر بولسا، ونىڭ 12 گەكتارىنا 32 مىڭ دانا الما اعاشىنىڭ كوشەتى وتىرعىزىلعان. قازىرگى تاڭدا، باۋدا المانىڭ رەد دەليشەس، گولدەن دەليشەس، گالا، گرەنني سميت سورتتارى ەگىلگەن. قوجالىق جۇمىسىمەن تانىسقان ءومىرزاق ەستاي ۇلى اۋدان اكىمىنە وتىرار ايماعىندا قارقىندى باۋ كولەمىن ارتتىرۋ قاجەتتىگىن تاپسىردى.

سونداي-اق، وبلىس اكىمى ارىستانباب كەسەنەسىنىڭ كىرە بەرىسىندە جۇرگىزىلىپ جاتقان اباتتاندىرۋ جۇمىستارىمەن دە تانىستى. جوبانى جۇزەگە اسىرۋ ءۇشىن وبلىستىق بيۋدجەتتەن 331 ملن. 929 مىڭ تەڭگە قارجى قارالعان. قۇرىلىس جۇمىستارى 2018 جىلى باستالعان. جوسپار بويىنشا بيىل شىلدە ايىندا پايدالانۋعا بەرىلەدى دەپ كۇتىلۋدە. اۋدان اكىمى ەرلان ايتاحانوۆ «اۋىل – ەل بەسىگى» جوباسىنا اياسىندا اۋداندا اتقارىلار جوبالارمەن تانىستىردى. ولاردىڭ قاتارىندا اۋدان ورتالىعىن اباتتاندىرۋ، الەۋمەتتىك نىسانداردى جوندەۋ جۇمىستارى بار.

ساپارى بارىسىندا ءومىرزاق ەستاي ۇلى جاڭادان سالىنىپ جاتقان «ساپار» ىسكەرلىك ورتالىعىنا بارىپ، ونداعى قۇرىلىس جۇمىستارىنا قانىقتى. جوبانى ىسكە اسىرۋ ءۇشىن رەسپۋبليكالىق بيۋدجەتتەن 798 ملن. 844 مىڭ تەڭگە قارجى باعىتتالىپ وتىر. بۇل نىساننىڭ دا قۇرىلىسى وتكەن جىلى قاراشا ايىندا باستالعان. جوسپار بويىنشا جىل سوڭىنا دەيىن اياقتالاتىن بولادى.

ودان بولەك، وبلىس باسشىسى «وتىرار-سۇت-ەت» اۋىلشارۋاشىلىق وندىرىستىك كووپەراتيۆىندە بولدى. ءسۇت جانە ەت ونىمدەرىن وڭدەۋمەن اينالىساتىن مەكەمە 2015 جىلى قۇرىلعان. كووپەراتيۆ تاۋلىگىنە 5 توننا ءسۇت، 1 توننا ەت وڭدەۋگە قاۋقارلى. جوبانىڭ ينۆەستيسيالىق قۇنى 120 ملن. تەڭگەنى قۇرايدى. مۇندا جالپى سانى 25 ادام تۇراقتى جۇمىسپەن قامتىلعان.

ءوڭىر باسشىسى اۋدانعا جاساعان ساپارىن ءشاۋىلدىر اۋىلىندا بوي كوتەرىپ جاتقان كوپقاباتتى تۇرعىن ۇيلەردىڭ قۇرىلىسىمەن تانىسۋمەن اياقتادى. اۋداندىق قۇرىلىس، ساۋلەت جانە قالا قۇرىلىسى ءبولىمىنىڭ تاپسىرىسىمەن سالىنىپ جاتقان ۇيلەردىڭ قۇرىلىسى 2018 جىلى باستالعان. جوسپار بويىنشا پاتەرلەر اعىمداعى جىلى ماۋسىم ايىندا ەل يگىلىگىنە تاپسىرىلاتىن بولادى.

وبلىس اكىمى جۇمىس ساپارىنىڭ سوڭىندا اۋدان باسشىسى ەرلان ايتاحانوۆقا ەلدىمەكەندەردىڭ ەكونوميكالىق-الەۋمەتتىك الەۋەتىن كوتەرۋ ماقساتىندا ءتيىستى شارالاردى قابىلداپ، جوسپار بويىنشا ىسكە اسىرۋدى تاپسىردى.

 

 

 

تۇركىستان وبلىسى اكىمىنىڭ باسپا ءسوز قىزمەتى