Aldymen aımaq basshysy Qoǵam aýyldyq okrýgindegi «Otyrar-Qural» JSHS-niń qarqyndy baýyna aıaldady. Alma ósirýmen aınalysatyn seriktestik 2019 jyly qurylǵan. Jobanyń ınvestısıalyq quny 200 mln. teńgeni quraıdy. Seriktestiktiń menshiginde 50 gektar jer bolsa, onyń 12 gektaryna 32 myń dana alma aǵashynyń kósheti otyrǵyzylǵan. Qazirgi tańda, baýda almanyń Red delıshes, Golden delıshes, Gala, Grennı smıt sorttary egilgen. Qojalyq jumysymen tanysqan Ómirzaq Estaıuly aýdan ákimine Otyrar aımaǵynda qarqyndy baý kólemin arttyrý qajettigin tapsyrdy.
Sondaı-aq, oblys ákimi Arystanbab kesenesiniń kire berisinde júrgizilip jatqan abattandyrý jumystarymen de tanysty. Jobany júzege asyrý úshin oblystyq búdjetten 331 mln. 929 myń teńge qarjy qaralǵan. Qurylys jumystary 2018 jyly bastalǵan. Jospar boıynsha bıyl shilde aıynda paıdalanýǵa beriledi dep kútilýde. Aýdan ákimi Erlan Aıtahanov «Aýyl – el besigi» jobasyna aıasynda aýdanda atqarylar jobalarmen tanystyrdy. Olardyń qatarynda aýdan ortalyǵyn abattandyrý, áleýmettik nysandardy jóndeý jumystary bar.
Sapary barysynda Ómirzaq Estaıuly jańadan salynyp jatqan «Sapar» iskerlik ortalyǵyna baryp, ondaǵy qurylys jumystaryna qanyqty. Jobany iske asyrý úshin Respýblıkalyq búdjetten 798 mln. 844 myń teńge qarjy baǵyttalyp otyr. Bul nysannyń da qurylysy ótken jyly qarasha aıynda bastalǵan. Jospar boıynsha jyl sońyna deıin aıaqtalatyn bolady.
Odan bólek, oblys basshysy «Otyrar-Sút-Et» aýylsharýashylyq óndiristik kooperatıvinde boldy. Sút jáne et ónimderin óńdeýmen aınalysatyn mekeme 2015 jyly qurylǵan. Kooperatıv táýligine 5 tonna sút, 1 tonna et óńdeýge qaýqarly. Jobanyń ınvestısıalyq quny 120 mln. teńgeni quraıdy. Munda jalpy sany 25 adam turaqty jumyspen qamtylǵan.
Óńir basshysy aýdanǵa jasaǵan saparyn Sháýildir aýylynda boı kóterip jatqan kópqabatty turǵyn úılerdiń qurylysymen tanysýmen aıaqtady. Aýdandyq qurylys, sáýlet jáne qala qurylysy bóliminiń tapsyrysymen salynyp jatqan úılerdiń qurylysy 2018 jyly bastalǵan. Jospar boıynsha páterler aǵymdaǵy jyly maýsym aıynda el ıgiligine tapsyrylatyn bolady.
Oblys ákimi jumys saparynyń sońynda aýdan basshysy Erlan Aıtahanovqa eldimekenderdiń ekonomıkalyq-áleýmettik áleýetin kóterý maqsatynda tıisti sharalardy qabyldap, jospar boıynsha iske asyrýdy tapsyrdy.
Túrkistan oblysy ákiminiń baspasóz qyzmeti
