قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلىنىڭ «ۇلت جوسپارى 100 ناقتى قادام» جولداۋىنىڭ 86،87 قادامدارىندا ءتۋريزمدى دامىتۋ مەن كلاستەرلەر قۇرۋ، قازاقستاندى الەمگە سونىڭ ىشىندە تۋريستەرگە تانىتۋ مەن جارنامالاۋ ماقساتىندا ناقتى جانە دالەلدى تۇردە ماسەلەلەر كوتەرىلگەن جانە تاپسىرمالار بەرىلگەن. تاپسىرماعا سايكەس وتىرار اۋدانىنىڭ اكىمى ەرلان ايتاحانوۆ اۋداندا ەتنومادەني اۋىلدىڭ بوي كوتەرىپ جاتقانىن كەزەكتى باسپا ءسوز ءماسليحاتىندا حابارلادى: «وبلىس اكىمى جانسەيىت تۇيمەبايەۆ تۋريزم سالاسىن دامىتۋ ارقىلى قازىناعا قوسىمشا قارجى تۇسىرۋگە بولاتىنىن ءجيى ايتىپ كەلەدى. وتكەندە تۇركسوي ۇيىمى ۇيىمداستىرعان «تۇركىستان – تۇركى الەمىنىڭ مادەني استاناسى» جوباسى اياسىندا وتىرارعا اقش، فرانسيا، تۇركيا ەلدەرىنەن 50 تۋريست كەلدى. ءبىز ولاردى كۇتىپ الىپ، ارىستانباب سەكىلدى تاريحي كەسەنەلەرگە اپاردىق. دەگەنمەن، شىنىمدى ايتسام، ولار اسا قىزىعۋشىلىق تانىتا قويمادى. سويتسەك، ولارعا تۇرمىستىق سالت-داستۇرلەر، جەرگىلىكتى مادەنيەت قىزىقتىراق ەكەن. سول كەزدە ولار بىزدەن ورتا عاسىرداعى قازاق حالقى پايدالانعان بۇيىمداردى سۇرادى. دەرەۋ جەرگىلىكتى قولونەر شەبەرلەرىن، زەرگەرلەردى شاقىرتىپ، تۋريستەرمەن ساۋدا-ساتتىق جاسادىق. اينالدىرعان 3-4 ساعاتتا تۋريستەردەن قازىناعا 1100 ەۋرو ءتۇستى. ءسويتىپ، ولار كيىز ءۇيدى، ونىڭ ىشىندەگى ۇلتتىق جيھازداردى، اسپاپتاردى كورگىلەرى كەلەتىنىن ايتتى. ەڭ سوڭى بىزگە ءوز ۇسىنىستارىن ايتتى. ناتيجەسىندە ەتنواۋىل جوباسى دۇنيەگە كەلدى، - دەپ كەلەشەكتە وتىراردا تۋريزم سالاسى قارىشتاپ داميتىنىنا سەنىم ءبىلدىردى.
ايتا كەتەيىك، جوسپاردىڭ 86 قادامىندا ايتىلعان «ۇلى جىبەك جولىن قايتا جاڭعىرتۋ» اتتى كلاستەر ءدال وسى وڭتۇستىك قازاقستان وبلىسىنا ارنالعان. كلاستەر 28 مۇراجايدى، 8 تەاتردى، 431 كىتاپحانانى، كلۋب ۇلگىسىندەگى 268 مەكەمەنى، 5 كينوتەاتردى، 39 مادەنيەت جانە دەمالىس ساياباقتارىن، 2 سيركتى، حايۋاناتتار باعىن، ءبىر كونسەرت ۇيىمىن قامتيدى. تاريحي-مادەني وبەكتىلەردىڭ قاتارىنا مىنالار كىرەدى: ەجەلگى تۇركىستان مەن «ازىرەت-سۇلتان» مەملەكەتتىك تاريحي-مادەني قورىق-مۇراجايىنىڭ ەسكەرتكىشتەرى، ورتاعاسىرلىق وتىرار قالاشىعى مەن وتىرار دالاسىنىڭ ارحەولوگيالىق وبەكتىلەرى (يۋنەسكو-نىڭ الدىن الا تىزىمىنە ەنگىزىلگەن)، ساۋران ارحەولوگيالىق كەشەنى، اقىرتاس ساراي كەشەنى، پالەوليتيكالىق ۋچاسكەلەرى مەن گەومورفولوگياسى بار قاراتاۋ مەملەكەتتىك تابيعي قورىعى، يۋنەسكو-نىڭ الدىن الا تىزىمىنە ەنگىزىلگەن ارپا-وزەن پەتروگليفتەرى، قورقىت اتا مەموريالدىق كەشەنى جانە تاعى دا باسقالار.
دەرەككوز: "وينەت" سايتى
