"وتباسىلى اداممەن قارىم-قاتىناسى بولعان": بيشىمبايەۆ سوتتا ءوز نۇسقاسىن مالىمدەدى

ساعىنىش سارداروۆا 01 ءساۋ. 2024 15:08 3769

ەكس-مينيستر قۋاندىق بيشىمبايەۆتىڭ ءىسى بويىنشا سوت وتىرىسى ءالى دە جالعاسىپ جاتىر. سوت وتىرىسى بارىسىندا باستى ايىپتالۋشى رەتىندە بيشىمبايەۆ وسى ىسكە قاتىستى ءوز نۇسقاسىن ايتتى، - دەپ حابارلايدى Dalanews.kz.

بيشىمبايەۆتىڭ سوزىنشە، سالتانات قازاقستاندا تانىمال وتباسىلى اداممەن كەزدەسكەنىن مويىنداعان.

"سول كۇنى كەشكە ول ماعان مويىندادى. مەن ودان نەگە بۇلاي جۇيكەسى سىر بەرىپ جۇرگەنىن سۇرادىم. ودان ءتۇسىندىرىپ بەرۋىن سۇرادىم. تويدان كەيىن 3-4 كۇن وتكەن ەدى. ول مەنىڭ كابينەتىمدە ءبىر ادامنىڭ سۋرەتى تۇرعانىن ايتتى. سۋرەتتە مەن ونىمەن بىرگە (نۇكەنوۆا ايتىپ وتىرعان اداممەن بىرگە - ەسك.) تۇسكەنمىن. ول ءبىر كەزدەرى سول كىسىنىڭ اشىناسى بولعانىن ايتتى. مەن ونىمەن تانىسپىن. ارينە، بۇل اقپارات مەنى ەسەڭگىرەتىپ تاستادى.

ودان 20 جاستاي ۇلكەن، 4 بالاسى بار، قازاقستاندا كادىمگىدەي تانىمال ادام. تەك ەسىمىن ايتايىن، ونىڭ ەسىمى - رايىمبەك.

مەن رەنجىدىم، ول ادامدى بىلەمىن. جۇمىس بويىنشا ءبىر كەزدەرى كەزدەسكەنبىز. ورتاق تانىسىمىز دا كوپ. بىزدە بىر-بىرىمىزگە ءبارىن اشىق ايتاتىن ۋاقىت بولعان كەزدە ولاي ىستەمەگەنىنە رەنجىدىم. ودان نەگە ايتپاعانىن سۇرادىم. ول "بۇل ءبىزدىڭ قارىم-قاتىناسىمىزعا اسەر ەتەدى" دەپ قورىققانىن جەتكىزدى"، - دەدى بيشىمبايەۆ.

سونىمەن قاتار، بۇرىن دا سوتتى بولعان ەكس-مينيستر وزگە دە ادامداردىڭ ەسىمدەرىن اتادى. ونىڭ سوزىنشە، سالتانات وتباسىلى ادامدارمەن كەزدەسكەن.

27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالعان ەدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. سودان كەيىن اشىق سوت وتىرىستارى باستالدى.

سونىمەن قاتار، قۋاندىق بيشىمبايەۆ سوتتا سالتانات نۇكەنوۆانى اسا قاتىگەزدىكپەن ولتىرگەنىن مويىندامادى. بۇل وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.

ال بۇگىنگى سوت وتىرىسىندا قۋاندىق بيشىمبايەۆ سالتانات نۇكەنوۆامەن قالاي تانىسقانىن دا ايتتى.

"مەن ونى Instagram-نان كوردىم. وعان استرولوگيالىق بولجامعا بارعان قىز استرولوگتار تۋرالى ايتتى. ماعان استرولوگيا قىزىق بولدى. ودان كورسەتۋىن سۇرادىم. تانىسىم Instagram-نان تانىمال استرولوگ دەپ كورسەتتى. ادەمى قىز ەكەنىن كوردىم، Instgram-ىن قاراپ شىقتىم. ونىڭ جىگىتى بار ەكەنىن دە كوردىم. 2022 جىلى مامىردىڭ اياعى ەدى. تانىسىم جىگىتى بار ەكەنىن، ۇيلەنگەلى جاتقانىن ايتتى. ...ءبىراز ۋاقىت سىرتتاي عانا باقىلادىم. ءبىر جولى ونىڭ قابىلداۋىنا جازىلعىم كەلدى. ءبىراق كومەكشىسى ونلاين تۇردە دە، تىرىلەي دە ەر ادامداردى قابىلدامايتىنىن ايتتى.

تامىزدىڭ اياعىندا سول قىز (تانىسى - ەسك.) توي بولمايتىنىن، (سالتانات - ەسك.) تۇرمىسقا شىققالى جاتقان جىگىتىمەن ايرىلىسقانىن جەتكىزدى. تانىسۋعا مۇمكىندىك بار ەكەنىن ءتۇسىندىم. كاميلا دەگەن قىزدان استرولوگيالىق بولجامعا جازىلۋىن ءوتىندىم. ال اڭگىمە بارىسىندا "دوسىم بار، ونىڭ دا كەلگىسى كەلەدى" دەپ ايتۋىن ءوتىندىم. ماعان تانىسۋ، ءبىر جاعىنان استرولوگيا تۋرالى ءبىلۋ قىزىق بولدى. كاميلا سالتاناتتىڭ قابىلداۋىنا بارعان. ولار دوستاسىپ كەتكەن. بىر-بىرىنە قىزدارعا قاتىستى وقيعالارىن ايتا باستاعان. سالتانات جىگىتىمەن ايرىلىسقانىن دا ايتقان. مەنىڭ دوس قىزىم "وسىنداي ادام بار، سەنى Instagram-دا كورگەن، تانىسقىسى كەلەدى" دەگەن. كاميلامەن تەلەفونمەن سويلەسىپ جاتقاندا، "ءوزىڭ سويلەسىپ كورگىڭ كەلە مە، جانىمدا وتىر" دەدى. مەن تەلەفون ارقىلى تانىسىپ، امانداستىم. سالتانات "ءسىز كەلگەن كەزدە استرولوگيالىق بولجام وتكىزە الامىن" دەدى. كەيىن قازاقستانعا كەلدىم.

سالتانات ۇزاق ۋاقىت استرولوگيالىق بولجامدى وتكىزگىسى كەلمەدى. سودان سوڭ وعان اشىعىن جازدىم. "شىنىن ايتسام، بولجام قىزىق ەمەس، ءسىز ماعان قاتتى ۇناپ قالدىڭىز، تانىسىپ كورگىم كەلەدى، كەشكى اسقا شاقىرسام" دەدىم. ول 1-2 كۇن جاۋاپ بەرمەدى. ءۇشىنشى كۇنى "كەزدەسە الامىز" دەدى. 6 قىركۇيەك بولۋى كەرەك، ءبىز كەزدەستىك"، - دەدى بيشىمبايەۆ.


ۇسىنىلعان
سوڭعى جاڭالىقتار
x