بۇگىندە الەم جۇرتشىلىعىن الاڭداتىپ وتىرعان كوروناۆيرۋس دەرتى، وكىنىشكە قاراي، قازاقستانعا دا جەتتى. ەل پرەزيدەنتى قاسىم-جومارت توقايەۆ توتەنشە جاعداي جاريالاپ، ىندەتكە قارسى كۇرەستى كۇشەيتۋ جونىندە تاپسىرما بەردى. مەملەكەت تاراپىنان ءتيىستى جۇمىستار اتقارىلۋدا.

وسى قىسىلتاياڭ شاقتا ەلىمىزدىڭ پاتريوت ازاماتتارى جومارتتىق تانىتىپ، حالىققا كومەكتەرىن تيگىزۋدە. سولاردىڭ ءبىرى – سىرىم ەرتايەۆ. بەلگىلى كاسىپكەر، «قايىپ اتا» ءجشس-نىڭ ديرەكتورى.

ەلباسى ۇندەۋىن قولداپ، «ءبىز بىرگەمىز!» اكسياسى اياسىندا ءوز قاراجاتى ەسەبىنەن ارنايى قورعا 10 ميلليون تەڭگە اۋداردى. «Nur Otan» پارتياسىنىڭ مۇشەسى، وتانشىل ازامات بۇعان دەيىن دە بىرنەشە وتباسىعا ءۇي سالىپ بەرىپ، قايىرىمدىلىعىمەن تانىلعان بولاتىن.

– تۇتاس قازاقستان اۋىر ىندەتكە قارسى كۇرەسىپ جاتقان ساتتە ەلگە كومەكتەسۋدى ازاماتتىق، پەرزەنتتىك پارىزىم دەپ بىلەمىن. ەلباسى نۇرسۇلتان نازاربايەۆ ءوز ۇندەۋىندە كاسىپكەرلەرگە ماڭىزدى وي تاستادى. پرەزيدەنتىمىز قاسىم-جومارت كەمەل ۇلى «ءبىز ءارقايسىمىز ءوز مىندەتىمىزدى جاۋاپكەرشىلىكپەن ورىنداساق، بۇل قيىندىقتان تەزىرەك شىعامىز» دەدى.

ەندەشە ءار ازامات توتەنشە جاعدايداعى ەرەجەسىن ساقتاپ، رەسمي وكىلدەر مەن دارىگەرلەردىڭ ەسكەرتپەلەرىن ورىنداعانى ءجون. ءبىز بىرىگىپ، بۇل قيىندىقتى دە جەڭىپ شىعامىز، – دەيدى سىرىم ەرتايەۆ.

«Nur Otan» پارتياسى تۇركىستان وبلىستىق فيليالىنىڭ باسپا ءسوز قىزمەتى