بٷگٸن مەدەنيەت جەنە ۇلتتىق دەستٷرلەر كٷنٸنە وراي ٶسكەمەن قالاسىنداعى وبلىستىق تاريحي-ٶلكەتانۋ مۋزەيٸ «يۋبيلەينىي» كينوتەاترىندا قالا تۇرعىندارى مەن قوناقتارىنا بۇرىن سوڭدى بولىپ كٶرمەگەن «بابالار ٸزٸمەن» اتتى ەرەكشە كٶرمە ۇيىمداستىردى, – دەپ حابارلايدى Dalanews.kz شقو ەكٸمٸنٸڭ باسپاسٶز قىزمەتٸنە سٸلتەمە جاساپ.
حالقىمىزدىڭ ەجەلگٸ دەۋٸردەن بٷگٸنگٸ كٷنگە دەيٸنگٸ ۇلى تاريحىنا تەرەڭ بويلاۋعا مٷمكٸندٸك بەرەتٸن تاماشا شارا «ەجەلگٸ دەۋٸردٸڭ جاندانعان بەينەلەرٸ» مەن تاريحي جاڭعىرتپالار ەلەمٸنە ەنگٸزەدٸ.
مۇرالاردى ساقتاپ, ٶتكەنٸمٸزگە كٶز جٷگٸرتۋ ٷشٸن ۇيىمداستىرىلعان جاڭا فورماتتاعى كٶرمەنٸڭ ەرەكشەلٸگٸ – كٶرەرمەندەر ەجەلگٸ دەۋٸردٸڭ تاريحي رەكونسترۋكتسييالارى ارقىلى بابالارىمىزدىڭ ٶمٸرٸن, تۇرمىسى مەن مەدەنيەتٸن جاڭاشا قىرىنان تاماشالاي الادى.
بۇل – تەك ەكسپوناتتاردى تاماشالاۋ ەمەس, سونىمەن قاتار ەجەلگٸ ادامداردىڭ دٷنيەتانىمىن, رۋحاني مەدەنيەتٸن, تاريحي مۇراسىن جاندى كەيٸپكەرلەر ارقىلى سەزٸنۋ مٷمكٸندٸگٸ. كٶرمە اياسىندا تٷرلٸ دەۋٸرلەردٸڭ كٶركەم ٶنەرٸ, مٷسٸندەرٸ, تۇرمىس بۇيىمدارى, كيٸمدەرٸ مەن سەن-سالتاناتىن كٶرسەتەتٸن ەكسپوناتتار ورنالاسقان. ەربٸر جەدٸگەردٸڭ ارتىندا ەرەكشە بٸر تاريح جاتىر, ال كٶرمەدە سول تاريحتى قايتا جانداندىرۋ ماقسات ەتٸلگەن.
ەرەكشە قىزىعۋشىلىق تۋعىزعان تاريحي رەكونسترۋكتسييالاردىڭ بٸرٸ – التىننان جاسالعان تٷركٸ قاعانىنىڭ بەينەسٸ. بۇل بەينەدە تەج كيٸپ, تاقتا وتىرعان قاعاننىڭ اسقاق مٷسٸنٸ كٶرمەنٸڭ ەرەكشە جەدٸگەرٸنە اينالدى. تاريحي-مەدەني تۇرعىدا قۇندى بۇل ارتەفاكت ەجەلگٸ تٷركٸ قوعامىنىڭ دٸني, ساياسي يدەولوگيياسىن ايشىقتايدى.
بۇدان بٶلەك, كٶرمەدە ۇسىنىلعان تاريحي جەدٸگەرلەر بٸزدٸڭ زامانىمىزدان بۇرىنعى VIII-VII عاسىرلارعا جاتاتىن ساق مەدەنيەتٸنٸڭ ەليتالىق ەسكەرتكٸشتەرٸ – بەرەل پاتشالار جازىعىنان تابىلعان اتاقتى ەيەلدٸڭ, ەلەكە سازى القابىنىڭ ەليتالىق قورعانىنان تابىلعان جاۋىنگەردٸڭ, تاسارىق قورعانىنان تابىلعان ابىز ەيەلدٸڭ جەنە قيماق جاۋىنگەر-مۋزىكانتتىڭ سالتاناتتى كيٸمدەگٸ جاندانعان بەينەلەرٸ تەرەڭ تاريحىمىزدان سىر شەرتەدٸ.
– شارانىڭ ماقساتى – ۇلى دالا تاريحىن ۇلىقتاپ, ۇلتتىق قۇندىلىقتارىمىزدى جاستارعا كەڭٸنەن ناسيحاتتاي وتىرىپ, ٶتكەن مەن بٷگٸننٸڭ ساباقتاستىعىن كٶرسەتۋ.
بۇل كٶرمە قوعامعا ٶتكەن زاماننىڭ مەدەنيەتٸ مەن ٶنەرٸنٸڭ, ونىڭ ٸشٸندە ەجەلگٸ حالىقتاردىڭ ٶمٸر سالتى مەن دٷنيەتانىمىن تەرەڭٸرەك تٷسٸنۋگە مٷمكٸندٸك بەرەدٸ. كٶرمەدە سول دەۋٸرلەردٸڭ سەن-سالتاناتى مەن ٶمٸرٸ, سونىمەن قاتار ٶنەر تۋىندىلارى مەن جەدٸگەرلەرٸ كٶرسەتٸلەدٸ. كٶرمە كەلۋشٸلەر ٷشٸن تەگٸن. بارشا قالا تۇرعىندارى مەن قوناقتارىن ٶتكەن تاريحىمىزعا ساياحات جاساۋعا شاقىرامىز, – دەيدٸ وبلىستىق تاريحي-ٶلكەتانۋ مۋزەيٸنٸڭ بٶلٸم مەڭگەرۋشٸسٸ الفييا باقباەۆا.
«ەجەلگٸ دەۋٸردٸڭ جاندانعان بەينەلەرٸ» كٶرمەسٸ جاس ۇرپاقتىڭ تاريحقا, مەدەنيەتكە جەنە ٶنەرگە دەگەن قىزىعۋشىلىعىن ارتتىرۋعا ىقپال ەتەدٸ. ەربٸر جەدٸگەر جاس ۇرپاققا سىرعا تولى تاريحىمىزدىڭ تٷپ-تامىرىن اشىپ, مەدەنيەتٸمٸزدٸڭ بايلىعىن كٶرسەتەدٸ.
