وسكەمەندە «ءقاۋىپسىز قالا» اكسياسى اياسىندا Amanat پارتياسىنىڭ جانىنداعى «جاستار رۋحى» جاستار قاناتىنىڭ شقو فيليالىنىڭ بەلسەندىلەرى شقو پوليسيا دەپارتامەنتى قىزمەتكەرلەرىمەن بىرگە قالانىڭ ويىن-ساۋىق ورىندارىنا رەيد جۇرگىزدى،- دەپ حابارلايدى Dalanews.kz
كامەلەتكە تولماعان جاسوسپىرىمدەر تۇنگى ۋاقىتتا زاڭدى وكىلدەرىنسىز مۇنداي مەكەمەلەردە بولماۋعا ءتيىس، سونداي-اق كاليان ونىمدەرىن تۇتىنۋعا تىيىم سالىنعان.
"ءار ادامنىڭ بولاشاق ۇرپاق الدىنداعى جاۋاپكەرشىلىگى بار. جاستارعا زاڭ تالاپتارىن ساقتاۋ قاجەتتىگىن ەسكە سالىپ، نەنىڭ دۇرىس، نەنىڭ بۇرىس ەكەنىن ءتۇسىندىرىپ وتىرۋ ماڭىزدى"، – دەدى وبلىستىق ءماسليحات دەپۋتاتى زويا نوۆولودسكايا.
اكسيا اياسىندا تەكسەرىلگەن مەكەمەلەردىڭ كەلۋشىلەرى دە، قىزمەتكەرلەرى دە بەلسەندىلەردىڭ جۇمىسىنا تۇسىنىستىكپەن قارادى، ەشقانداي اگرەسسيا نەمەسە تەرىس رەاكسيا بايقالعان جوق. پوليسيا وكىلدەرى ءوز كەزەگىندە مەكەمە قىزمەتكەرلەرى مەن قوناقتارىنا كاليان ونىمدەرىن ساتۋ جانە پايدالانۋ، سونداي-اق كامەلەتكە تولماعانداردىڭ تۇنگى ۋاقىتتا ويىن-ساۋىق ورىندارىندا بولۋىنا قاتىستى زاڭنامالىق تالاپتاردى ءتۇسىندىرىپ، پروفيلاكتيكالىق اڭگىمە جۇرگىزدى.
"قازاقستان رەسپۋبليكاسىنىڭ ىشكى ىستەر ءمينيسترى 2025 جىلدى زاڭ مەن ءتارتىپتى ساقتاۋدىڭ الدىن الۋ جىلى دەپ جاريالادى. بۇگىن ءبىز Amanat پارتياسى وكىلدەرىمەن جانە وبلىستىق دەپۋتاتتارمەن بىرلەسىپ، قالاداعى ويىن-ساۋىق ورىندارىندا پروفيلاكتيكالىق ءىس-شارالار جۇرگىزۋ ءۇشىن 60-تان استام قىزمەتكەرىمىزدى جۇمىلدىردىق"، – دەدى وسكەمەن قالالىق پب جەرگىلىكتى پوليسيا قىزمەتى ءبولىمىنىڭ باستىعى، پوليسيا پودپولكوۆنيگى دارحان بۇلانوۆ.
وسىنداي اكسيالار – ازاماتتاردىڭ قاۋىپسىزدىگىن قامتاماسىز ەتۋ جانە قولايلى ورتا قالىپتاستىرۋ باعىتىنداعى ماڭىزدى شارالاردىڭ ءبىرى.
