اكىمنىڭ ايتۋىنشا، بيىل وبلىستا قۇرىلىس قارقىنى ەڭ ۇلكەن كورسەتكىشكە جەتتى. سوڭعى 5 جىلدا العاش رەت ءبىر جىلدا ميلليون شارشى مەتر جاڭا تۇرعىن ءۇي پايدالانۋعا بەرىلدى.
ايماقتا جەكە قۇرىلىس سالۋشىلارمەن ىنتىماقتاسا وتىرىپ، «ءبىر قاباتتى شىعىس» باعدارلاماسىن قولداۋ ارقىلى قۇرىلىس قارقىنىنىڭ وسى دەڭگەيىن ساقتاۋ كەرەك.
[caption id="attachment_65155" align="aligncenter" width="561"]
Danial_Ahmetov[/caption]
سونىمەن بىرگە، اكىمدىك «باقىتتى وتباسى» باعدارلاماسى بويىنشا يپوتەكا رەسىمدەۋگە نيەت بىلدىرگەن كوپبالالى وتباسىلارعا تۇرعىن ءۇي سەرتيفيكاتىن بەرۋ جۇيەسىن ەنگىزبەك.
شقو-دا الەۋمەتتىك-مادەني نىساندار كوپتەپ سالىنۋدا. ماسەلەن، اۋرۋحانا، مەكتەپ، بالاباقشا، سپورت زال، كلۋب سياقتى تاعى باسقا دا 27 الەۋمەتتىك مادەني-تۇرمىستىق نىسان ءبىر ۋاقىتتا سالىنىپ جاتىر.
اسىرەسە، وبلىس ورتالىعىنان شالعايدا ورنالاسقان ەلدى مەكەندەرگە باسىمدىق بەرىلدى.
بورودۋليحا، مارقاكول، تاۆريا، ۇلكەن نارىن، سامار سىندى كوپتەگەن اۋىلدار مەن كەنتتەردە بيىلدىڭ وزىندە باسسەيندەر جانە جاڭا دەنە شىنىقتىرۋ-ساۋىقتىرۋ ورتالىقتارى پايدالانۋعا بەرىلدى. ال سپورت مودۋلدەرى شالعايداعى بارلىق ەلدى مەكەنگە سالىنادى.
قابانباي اۋىلىندا بيىل تەك مودۋل عانا ەمەس، پوليسيا ءبولىمى مەن فەلدشەرلىك-اكۋشەرلىك پۋنكتتىڭ قۇرىلىسى دا اياقتالادى.
ەڭ اۋقىمدى جوبالاردىڭ ءبىرى – سەمەي قالاسىنان بالالارعا ارنالعان وڭالتۋ ورتالىعىن سالۋ. بۇدان بولەك، سەمەي قالاسىنداعى ستەپنوي جانە ۆوستوچنىي كەنتتەرىندە جاڭا مەكتەپتەردىڭ قۇرىلىس جۇمىستارى قارقىن العان.
– بارلىق نىساننىڭ قۇرىلىسى كەستەدەن كەشىكپەي ءجۇرىپ جاتىر. دەگەنمەن، سوڭعى ۋاقىتتا مەردىگەر كومپانيالار قۇرىلىس ماتەريالدارى قىمباتتاپ كەتتى دەگەن ماسەلەنى ءجيى كوتەرىپ ءجۇر. وسىعان بايلانىستى وبلىستىڭ قۇرىلىس جانە ەكونوميكا باسقارمالارىنا ءاربىر جاعدايدى مۇقيات قاراۋدى، قاجەت بولسا جوبالارعا تۇزەتۋ ەنگىزۋدى تاپسىرامىن. قۇرىلىس جۇمىستارىنىڭ ساپاسى وسىعان بايلانىستى ەكەنىن ۇمىتپاڭىزدار، – دەدى ايماق باسشىسى.
